O comisario da Lingua Galesa, Aled Roberts, declarou que se debe protexer e incentivar a agricultura porque é un sector importantísimo para a supervivencia do galés como lingua comunitaria.

Fonte: BBC

O poeta Nuno Júdice e o ensaísta Fernando Venâncio son os vencedores do Premio de Ensaio Jacinto do Prado Coelho. Os dous autores portugueses obtiveron o importante galardón, instituído pola Asociación Internacional de Críticos Literarios, polas obras Camões por cantos nunca dantes navegados e Assim nasceu uma língua, respectivamente.

Fonte: Público

A Real Academia da Lingua Vasca ou Euskaltzaindia presentou no Concello de Baiona (Iparralde) a ferramenta dixital "Euskara eskuz esku" (EEE, o éuscaro de man en man) co obxectivo de impulsar a lingua unificada en Iparralde.

Fonte: El Diario Vasco

O Instituto Cervantes de Salvador de Baía (Brasil) ofrece unha mostra virtual de curtametraxes de temática LGBTQI+ en español. As producións estarán dispoñibles na canle Vimeo do Instituto Cervantes.

Fonte: Globo

A Biblioteca Nacional do Perú e a Dirección de Linguas Indíxenas do Ministerio de Cultura organizan cursos en liña de quechua (da variedade chanka) e ashaninka. Os cursos serán impartidos por medio de plataformas de videoconferencia.

Fonte: TVRobles

San Tomé e Príncipe reintroduciu o ensino opcional da lingua alemá no sistema escolar, despois de anos de ausencia nos centros educativos do arquipélago.

Fonte: Deutsche Welle

Por medio da aprobación dunha lei de 2018, a Xunta Rexional da Rexión Autónoma de Sardeña autorizou a impartición da lingua algueresa nas escolas da cidade de Alguer.

Fonte: dBalears

A Universidade Napier de Edimburgo converteuse no terceiro centro de ensino superior de Escocia que decide recortar os seus estudos de natureza lingüística por motivos de baixa rendibilidade económica.

Fonte: The Times

A Universidade da Integración Internacional da Lusofonía Afro-Brasileira (UNILAB), con sede no estado brasileiro de Ceará, ampliou recentemente a súa oferta de cursos dedicados á lingua portuguesa. 

Fonte: Plataforma Media

O ministro italiano de Cultura, Dario Franceschini, confirmou que o ano que vén comezarán as obras en Florencia do Museo da Lingua Italiana. O inicio deste proxecto coincidirá co aniversario dos 700 anos da morte de Dante.

Fonte: ANSA