O Goberno italiano aprobou un aumento do financiamento para o ensino da lingua e da cultura italianas no exterior nos anos 2026 e 2027. A medida inclúe máis apoio aos cursos de lingua, ás escolas italianas fóra do país e aos programas de bolsas, co obxectivo de fortalecer os vínculos coas comunidades italianas no mundo.

Fonte: Italianismo

O mestrado en Lingua Portuguesa da Escola Superior de Educación - Unidade Tchico Té é o primeiro da Guinea-Bissau e arrancou este mes coa coordinación científica da Universidade do Miño.

Fonte: SAPO

As autoridades xaponesas están estudando introducir a esixencia de coñecemento do xaponés para acceder á residencia permanente, dentro dunha reforma das políticas migratorias ante o aumento da poboación estranxeira. A medida podería aplicarse nos vindeiros anos xunto con outros criterios máis estritos de integración e cumprimento de obrigas civís.

Fonte: The Economic Times

A Plataforma pola Lingua denunciou o importante retroceso que sofre o catalán no ensino da Cataluña Norte tras se constataren os datos difundidos polo Observatorio da Oficina Pública da Lingua Catalá, que mostraron que só un 19 % do alumnado en idade escolar tivo contacto coa lingua vernácula durante a súa escolaridade.

Fonte: Diari de la Llengua

Diversos colectivos marroquís pediron un maior uso do árabe na educación, na administración e nos servizos públicos, co obxectivo de reducir o peso do francés na vida pública. A iniciativa subliña a importancia de reforzar a identidade lingüística do país e de aplicar de forma efectiva o status oficial do árabe.

Fonte: TRT Português

A localidade de Sendim, en Miranda do Douro, conta cun novo espazo cultural dedicado á lingua mirandesa. O proxecto, situado na antiga escola primaria, busca preservar e divulgar esta lingua a través de actividades culturais, exposicións e encontros. O centro tamén rende homenaxe ao escritor Amadeu Ferreira, figura clave na defensa do mirandés.

Fonte: A Voz de Trás os Montes

A compañía aérea Swiss analiza a posibilidade de suprimir a esixencia de coñecer alemán para pilotos e tripulantes de cabina, mantendo o inglés como lingua obrigatoria. A medida responde á escaseza de persoal e busca ampliar o número de candidaturas nos diferentes postos. 

Fonte: Aviation Direct

O sector editorial de Islandia vive un ano excepcional, xa que en 2025 se publicou o maior número de novelas da súa historia recente. O incremento reflicte a boa saúde da creación literaria no país e o mantemento dun forte interese pola narrativa local, malia o tamaño reducido do mercado editorial islandés.

Fonte: RÚV

A publicación de An Foclóir Nua Gaeilge marca un fito para a lingua irlandesa ao tratarse do primeiro dicionario monolingüe completo que analiza a lingua irlandesa sen depender de dicionarios en inglés. A obra define as palabras directamente en irlandés, o que favorece unha aprendizaxe máis natural e unha maior autonomía da lingua. O proxecto busca fortalecer o seu uso cotián, educativo e cultural, contribuíndo á súa revitalización.

Fonte: Irish Central

Unha investigación internacional publicada na revista Nature Human Behaviour que analizou máis de 1.700 linguas indica que moitos idiomas, aínda que afastados xeográfica e culturalmente, comparten patróns gramaticais profundos. Este achado reforza a idea de que a linguaxe humana funciona sobre bases universais, alén das diferenzas superficiais.

Fonte: Tribuna de Minas