É urxente crear dicionarios, glosarios e manuais escolares para asegurar o futuro da lingua mirandesa, advirte o lingüista António Alves. Estes proxectos levan anos de traballo, polo que cómpre planificalos xa para garantir que a lingua sobreviva nas próximas décadas.

Fonte: Rádio Brigantia

Milleiros de persoas concentráronse en Dublín nunha manifestación considerada “histórica”, na que reclamaron unha acción política urxente para protexer e revitalizar a lingua irlandesa e as zonas onde este idioma é o predominante nas comunidades locais (Gaeltacht).

Fonte: The Irish Times

Mónica Bastos, coordinadora do Ensino Portugués en Bélxica, Países Baixos e Luxemburgo, destaca que cada vez máis estudantes e docentes luxemburgueses se matriculan en cursos de portugués. O aumento das inscricións confirma a presenza e expansión da lingua de Camões en Luxemburgo.

Fonte: Contacto

O Consello de Europa publicou dous informes que recoñecen os esforzos de Armenia e Eslovaquia pola protección das linguas minoritarias, especialmente o húngaro en Eslovaquia, pero advirte de que aínda hai moito por facer. En Armenia, por exemplo, móstrase unha mellora na oferta educativa para linguas minoritarias, aínda que segue habendo carencia de profesorado cualificado.

Fonte: Council of Europe

O chanceler alemán, Friedrich Merz, reiterou a súa oposición a facer oficiais o catalán, o galego e o éuscaro na UE, alegando que a súa incorporación complicaría o sistema de traducións. Apuntou que, a medio prazo, a intelixencia artificial podería permitir unha solución ao eliminar a necesidade de intérpretes.

Fonte: Diari de la Llengua

O Ministerio de Educación de Cabo Verde decidiu suspender a distribución nas escolas do manual escolar de lingua e cultura caboverdiana despois das críticas lanzadas por varios sectores sociais e culturais. A medida, presentada como un xesto de diálogo, pretende evitar tensións e favorecer un debate sobre a mellor forma de ensinar a lingua nacional. 

Fonte: RNA

Vinte e sete anos despois do recoñecemento oficial da lingua mirandesa, Miranda do Douro e todo Portugal celebran o Día da Lingua Mirandesa. Ao longo de toda a semana, organizáronse diversas actividades destinadas a promover e difundir a segunda lingua oficial de Portugal.

Fonte: Renascença

A Universidade do Miño abre este semestre inscricións para cursos de dez linguas estranxeiras, ofrecendo modalidades presenciais e en liña. Destacan os cursos de xaponés e portugués como lingua estranxeira no campus de Azurém.

Fonte: Reflexo digital

A Universidade de Shanghai abriu un novo Centro de Estudos de Países e Rexións de Lingua Portuguesa. O obxectivo é impulsar o diálogo cultural, a integración lingüística e a cooperación internacional entre a China e os países de lingua portuguesa.

Fonte: Xinhua

O Comité Permanente da Asemblea Popular Nacional en China está a examinar dúas novas leis que buscan reforzar a integración das minorías étnicas mediante o uso obrigatorio do mandarín en ámbitos como a educación e os servizos públicos. Estas propostas provocan inquietude pola posible perda de diversidade lingüística, especialmente en rexións como o Tíbet e Xinjiang.

Fonte: Asia News