O Instituto Confucio da Universidade Ricardo Palma abriu en Cusco o seu primeiro centro de ensino de chinés, nun esforzo por afondar os vínculos culturais e educativos entre Perú e China. Con actividades que combinan tradicións asiáticas e andinas, máis de 50 persoas estudan lingua e cultura chinesas nun centro que tamén ofrecerá cursos adaptados ao turismo co obxectivo de reforzar a preparación local para acoller visitantes chineses.

Fonte: CGTN

A edición 2025 dos Premios CaSa foi presentada en Oaxaca como mostra do compromiso coa diversidade lingüística ao recoñeceren creacións literarias en oito linguas indíxenas. A iniciativa, impulsada polo artista Francisco Toledo, suma xa quince anos de traxectoria e consolidouse como referente nacional na promoción das linguas orixinarias.

Fonte: Instituto Nacional de Lenguas Indígenas

O ensino da lingua portuguesa xunta na Guinea-Bissau ao longo de tres días persoas expertas de varios países lusófonos co obxectivo de fortalecer a cooperación científica e contribuír á mellora do sistema educativo guineano.

Fonte: Observatório da Língua Portuguesa

O Concello de Vilnius decidiu que, a partir do próximo curso, as escolas primarias de minorías nacionais terán polo menos seis horas semanais de lingua e literatura lituana, co obxectivo de mellorar o dominio do idioma vernáculo e os resultados académicos.

Fonte: LRT

Máis dun século despois da colonización, a lingua ainu estivo a piques de desaparecer. Hoxe, grazas a vellas gravacións, a intelixencia artificial podería axudar a salvar este idioma do norte do Xapón da extinción.

Fonte: BBC 

O Goberno galés anuncia un plan para frear o declive do idioma nas áreas onde tradicionalmente ten maior presenza, como Anglesey, Gwynedd, Carmarthenshire e Ceredigion. As medidas inclúen mellorar o acceso á educación en galés e ofrecer máis orientación no uso da lingua en ámbitos como a vivenda, a economía e o desenvolvemento comunitario.

Fonte: BBC 

Segundo o ministro de Educación de Guinea-Bissau, menos do 5 % da poboación emprega o portugués no seu día a día. A maioría comunícase en crioulo, o que evidencia a escasa presenza social do portugués fóra do ensino. O Goberno traballa en iniciativas para aumentar o uso da lingua oficial no país.

Fonte: Forbes África Lusófona

O Programa de Posgrao en Letras da Universidade Federal do Rio Grande (FURG) presentou un dicionario electrónico que recolle información sobre autores, xornais e publicacións literarias de diferentes países lusófonos. O recurso pretende facilitar o acceso e estudo da tradición xornalística literaria en lingua portuguesa.

Fonte: FURG

As editoras Fitzcarraldo Editions, Giramondo Publishing e New Directions lanzan un premio para recoñecer a mellor colección de poesía traducida ao inglés. O galardón busca dar visibilidade a voces poéticas innovadoras de todo o mundo e ampliar a diversidade na poesía en inglés.

Fonte: The Guardian

O Goberno de Andorra propón flexibilizar os requisitos de catalán para persoal sanitario e permitirá autorizacións provisionais de até dous anos a quen estudase no país, aínda sen ter o certificado oficial.

Fonte: Diari de la Llengua