O Goberno do Canadá e o territorio federado de Yukón asinaron un acordo bilateral para reforzar o ensino do francés e garantir unha educación de calidade na segunda lingua oficial desde o preescolar até niveis educativos superiores. 

Fonte: Correio da Manhã

Aínda que o bambara é a lingua máis falada en Malí, nas escolas só se ensina francés. Agora, unha iniciativa baseada no uso da intelixencia artificial busca promover a alfabetización na lingua propia e pretende que o alumnado poida non só falar, senón tamén ler e escribir na súa lingua materna.

Fonte: DW

Unha delegación da Universidade do Porto e do seu Instituto Confucio viaxou á China para participar en eventos centrados na cooperación internacional e na mellora do ensino do chinés, co fin de fortalecer lazos culturais e educativos entre universidades.

Fonte: Universidade do Porto

As comunidades tradicionais do Brasil, de poboacións como os Tupari ou os Makurap, están a traballar conxuntamente con proxectos populares e políticas públicas para protexer a diversidade das linguas brasileiras e combater a súa desaparición, defendendo o valor cultural e os saberes ancestrais asociados a eses idiomas e culturas.

Fonte: Portal Amazônia

As comunicacións de emerxencia no Canadá envíanse maioritariamente só en inglés e francés, deixando fóra moitas comunidades indíxenas. Isto dificulta que miles de persoas reciban e comprendan avisos vitais a tempo. A situación mostra unha falta de inclusión lingüística nos sistemas oficiais de alerta á poboación.

Fonte: The Conversation

A sección de ensino primario da escola Ebbw Fawr Learning Community foi recoñecida co galardón Cymraeg Campws Aur (Campus Galés de Ouro), converténdose na primeira escola primaria de Blaenau Gwent en obter este premio. O centro foi distinguido polo seu compromiso coa promoción da lingua e da cultura galesas, co obxectivo de crear un ambiente de aprendizaxe inclusivo e entusiasta, froito de anos de dedicación do profesorado e do alumnado.

Fonte: South Wales Argus

Un novo grupo de traballo en Escocia, chamado Tog, busca impulsar o uso do gaélico no mundo laboral e crear novas oportunidades económicas nas zonas onde a lingua ten maior presenza e uso. A iniciativa aspira a converter a lingua e a cultura en motores de desenvolvemento, reforzando o tecido social e laboral das comunidades locais.

Fonte: BBC

O Consello de Europa considera que, malia os avances rexistrados nalgúns ámbitos, Dinamarca debe reforzar a promoción do alemán como lingua minoritaria en todo o país. Entre as principais recomendacións figuran a súa maior presenza no sistema educativo e un incremento da súa visibilidade nos medios de comunicación.

Fonte: Council of Europe

Varios presos da prisión galesa de HMP Berwyn, en Wrexham, denunciaron ante investigadores das universidades de Cardiff e Liverpool que o persoal lles impedía falar galés e un deles afirmou que mesmo se lle prohibiu empregar o galés nunha reunión privada co seu avogado. A Comisaria da Lingua Galesa, Efa Gruffud Jones, expresou a súa preocupación, sinalando que os feitos revelan unha falta de respecto polos dereitos lingüísticos básicos nos centros penitenciarios.

Fonte: BBC

As escolas de inmersión en catalán da Cataluña Norte iniciaron unha campaña dirixida aos candidatos das eleccións municipais de 2026 para coñecer o seu compromiso coa lingua, coa cultura e co modelo de inmersión lingüística. A iniciativa busca que os futuros responsables municipais se posicionen claramente sobre a defensa e promoción do catalán no territorio de administración francesa.

Fonte: Diari de la Llengua