A Organización das Nacións Unidas (ONU) vén de lanzar oficialmente o seu Ano Internacional das Linguas Indíxenas co que pretende promover a revitalización dos idiomas nativos do mundo e evitar así unha perda de valor incalculable.

Fonte: UN News

Un grupo de máis de cen persoas participou nunha mobilización na cidade de Toulouse para protestar pola eliminación do ensino do occitano nas escolas secundarias. A medida deixará sen esta materia a uns 15000 estudantes.

Fonte: Nationalia

Un informe elaborado polo Departamento de Educación de Irlanda do Norte revela que se necesitarían máis escolas infantís de inmersión en gaélico irlandés no territorio norteirlandés.

Fonte: Belfast Telegraph

A Organización das Nacións Unidas (ONU), a través do seu relator especial Fernand de Varennes, emitirá un ditame sobre a situación da lingua galega despois da súa visita especial a España.

Fonte: Praza Pública

Asociacións educativas, pais e nais e profesorado das escolas infantís de fala galesa do País de Gales mostraron a súa preocupación ante as medidas do Goberno de Gales de introducir horas obrigatorias de ensino en inglés neses centros.

Fonte: BBC

Con motivo do Ano Internacional das Linguas Indíxenas, a ONU decidiu dedicar un número da súa publicación The Unesco Courier aos pobos indíxenas e aos seus modos de expresión.

Fonte: UNESCO

Un estudo realizado na Universidade de York, no Canadá, revelou que os bebés de seis meses que están expostos a máis dunha lingua no ámbito familiar conseguen desenvolver unha mellor capacidade de atención que os criados nunha única lingua.

Fonte: EurekAlert

O presidente da rexión francesa de Normandía, Hervé Morin, quere dar luz verde a un proxecto para a promoción da lingua normanda. Entre as medidas figura a introdución da lingua no ensino e a creación dunha academia para normalizar o seu uso.

Fonte: Ouest France

Os pobos indíxenas do Canadá acadaron un importante avance no recoñecemento das súas linguas nativas. A partir de agora, o Parlamento do Canadá estará obrigado a ofrecer servizo de interpretación de todas aquelas intervencións que se fagan nas linguas destes pobos orixinarios.

Fonte: The Guardian

Organizacións a prol dos dereitos humanos volveron demandar a liberación do activista Tashi Wangchuk que cumpriu tres anos no cárcere por defender a lingua tibetana en China.

Fonte: RFA