Tras un encontro na cidade de Bogotá de trinta líderes das comunidades afrodescendentes, xitanas, palenqueros (falantes da lingua palenque) e indíxenas de todo o país discutiuse o proxecto de lei que busca favorecer a protección e o fomento das linguas nativas.

Fonte: Vanguardia

O vicepresidente do Goberno catalán, Josep Lluís Carod-Rovira, terminou unha visita de tres días a Ecuador en defensa dos sistemas educativos bilingües.

Fonte: El País

Un equipo de enxeñeiros traballa nun proxecto denominado “Tecnoloxía lingüística ao servizo da educación a pobos indíxenas” que ten como obxectivo salvar dúas linguas en perigo de extinción: o náhuatl e o quechua. A súa misión é ofrecer unha ferramenta de acceso á información de internet a todas as comunidades do planeta que falen algún destes dous idiomas.

Fonte: La Gaceta

A canle francófona internacional TV5Monde anunciou o lanzamento dun servizo de internet de lingua francesa gratuíto para o teléfono móbil destinado a aprender este idioma de xeito lúdico.

Fonte: AFP

Un requisito para ingresar como sacerdote do seminario de San Cristóbal será falar polo menos unha lingua indíxena, pois a maioría da poboación da diocese pertence a algunha etnia.

Fonte: La Jornada

Case a metade dos nenos kurdos desprazados en Turquía non pode asistir á escola e outras minorías enfróntanse á discriminación institucional na educación, segundo afirmou un informe. Os nenos kurdos, así como doutros grupos étnicos, que asisten ás escolas públicas non poden estudar na súa lingua materna.

Fonte: International Herald Tribune

Singapur posúe o privilexio de ter unha comunidade de falantes de mandarín e este idioma debe converterse na lingua común dos habitantes de Singapur chineses. Así se indica nunha nova campaña en favor do mandarín que xa se leva facendo dende o ano 1979.

Fonte: French Xinhuanet

As cifras amosan que máis de medio millón de mozos do Reino Unido ten como lingua inicial un idioma distinto do inglés, o que supón un 14,3 % do total.

Fonte: Telegraph

O lingüista Domingos Lopes animou as mulleres da Igrexa Metodista a crear o hábito de usar as linguas vernáculas nas súas casas.

Fonte: Agência Angola Press

Corea enviará un grupo de expertos para promover a lingua coreana en Paquistán, segundo afirmou o embaixador de Corea Shin Un, que participou no terceiro Concurso de Discursos Coreano na Universidade Nacional de Linguas Modernas.

Fonte: Daily Times