O Senado brasileiro lanzou o día 15 de abril, na Biblioteca Acadêmico Luiz Viana Filho, unha guía impresa en braille do Novo Acordo Ortográfico da Lingua Portuguesa.

Fonte: Senado Federal

A lingua portuguesa poderá ensinarse proximamente nas escolas do ensino de base de Zambia, segundo anunciou en Luanda o ministro zambiano para os Asuntos da Presidencia, Ronald Mukuma.

Fonte: Panapress

Hai corenta anos, New Brunswick aprobou a Lei de linguas oficiais, que cambiou o curso da historia da provincia e desencadeou un debate cultural e social que aínda continúa hoxe.

Fonte: Edmonton Sun

Os nenos escolarizados en Suíza central e que comezaron aprendendo inglés aprenden mellor o francés. E os que medraron nun contexto plurilingüe teñen vantaxes na súa aprendizaxe do francés. Esta é a conclusión dun estudo piloto realizado no marco do Programa nacional de investigación "Diversidade de linguas e competencias lingüísticas en Suíza".

Fonte: Presseportal

A mostra sobre o galego e a diversidade lingüística poderá visitarse no espazo Casa da Cultura de Bos Aires entre o 15 e o 28 de maio. Trátase da segunda vez que viaxa ao estranxeiro, logo do seu paso pola Comisión Europea de Bruxelas en setembro do ano pasado.

Fonte: Xunta de Galicia

A páxina web oficialitat.cat, dispoñible en máis de trinta linguas, espera conseguir sinaturas de cidadáns de toda Europa para que a presidencia española da Unión, prevista para o primeiro semestre de 2010, promova que o catalán se converta en oficial neste organismo.

Fonte: El País

O Instituto Nacional de Linguas Indíxenas (Inali) promove a gravación do himno nacional en linguas indíxenas, para que en 2010 se integre nun disco compacto destinado a conmemorar o Bicentenario da Independencia de México.

Fonte: SDP

Un recente estudo do Fonds national estudou o impacto do multilingüismo helvético sobre os textos xurídicos e conclúe que, mesmo existindo posibilidades de mellora, o feito de ter que lexislar nas tres linguas de Suíza permite mellorar a calidade lexislativa.

Fonte: Swissinfo

Diversas organizacións tátaras, a comunidade máis numerosa en Rusia despois da maioría rusa, comezaron unha campaña para demandar a Moscova un maior recoñecemento da súa lingua e o respecto á soberanía da República federada do Tatarstán.

Fonte: Nationalia

O Ministerio de Cultura de Colombia inaugurou unha trintena de actividades programadas para celebrar a Primeira Festa das Linguas Nativas, que se desenvolverá ao longo desta semana no marco do Día do Idioma.

Fonte: ADN