Un habitante flamengo de cada tres das comunidades da periferia de Bruxelas móstrase preocupado polo emprego doutras linguas diferentes do neerlandés nos espazos públicos do seu municipio, revela un estudo realizado pola Vrije Universiteit Brussel.

Fonte: RTL Info.be

Os falantes de linguas indíxenas mexicanas aumentaron a súa presenza nas grandes cidades do país, explicou a antropóloga Regina Martínez Casas nun foro organizado polo Instituto Nacional de Antropoloxía e Historia (INAH).

Fonte: EFE

O Instituto Goethe, dedicado á lingua e á cultura alemás, continúa promovendo a sensibilización acerca da importancia do plurilingüismo. Os expertos afirman que a falta de coñecemento de linguas estranxeiras en Europa está a prexudicar a economía.

Fonte: DW-World

Especialistas indíxenas desenvolveron un software libre para xerar deseños propios nas linguas dos pobos autóctonos, informou a Rede Nacional de Voceiros Comunitarios Indíxenas de Venezuela (RENAVIVE).

Fonte: El Patagónico

A ministra de Educación de Irlanda do Norte advertiu que a lingua irlandesa precisa ser consagrada nunha lei. Caitriona Ruane salientou a falta dunha lei da lingua irlandesa tras unha xuntanza cun comité europeo que analiza a aplicación da Carta Europea das Linguas Rexionais ou Minoritarias.

Fonte: Belfast Telegraph

O Parlamento de Tartaristán está a considerar emendas á lei sobre as súas linguas nacionais despois de que o Tribunal Supremo lle ordenase ao Goberno tártaro a harmonización da lei coa lexislación federal rusa.

Fonte: RFERL

Os investigadores do Web Ecology Project realizaron unha análise para identificar as linguas máis usadas no Twitter. A lingua portuguesa quedou no segundo lugar, só por detrás do inglés.

Fonte: IOL

A Unión Europea fai un chamamento ante a seria escaseza de intérpretes de lingua francesa para os próximos 5 ou 10 anos.

Fonte: Boursier

O 24 de setembro, o Comité de Ministros do Consello de Europa fixo público o segundo informe sobre a situación das linguas minoritarias de Armenia. Este informe foi redactado por un comité de expertos independentes que analiza a aplicación da Carta Europea das Linguas Rexionais ou Minoritarias.

Fonte: Today

Aínda que se mantén en cifras moi modestas, o ensino universitario do español en Sudáfrica multiplicouse case por tres desde 1990, e de 160 estudantes hai dúas décadas pasouse a 450 na actualidade, segundo cifras do Instituto Cervantes.

Fonte: ADN