O portugués está en vías de ser recoñecido como lingua de traballo na Asociación dos Comités Nacionais Olímpicos de África (ACNOA), ao lado do inglés e do francés.

Fonte: AngolaPress

Nun intento destacado por adaptarse á diversidade, o Parlamento indio permítelles aos novos membros que escollan a forma de xuramento en calquera das 22 linguas recollidas no punto oito da Constitución.

Fonte: Times of India

As persoas que queiran obter a residencia na Illa de Cook axiña terán que aprender maorí. O ministro de Inmigración, Terepai Maoate, afirma que esta medida ten como obxectivo reforzar o papel da lingua maorí como elemento clave da identidade nacional do país.

Fonte: Radio Australia

O estudo do chinés está aumentando en Francia, segundo un sinólogo francés. Cada vez máis institutos e universidades de Francia comezan a ofrecer clases de chinés.

Fonte: Xinhuanet

Os subtítulos en inglés dunha película filmada neste idioma poden axudar a aprender esta lingua segundo un estudo do Instituto Max Planck de Psicolinguística e a Universidade Radboud de Nimega (Países Baixos) que se publica na revista PLoS ONE. No entanto, se os subtítulos se encontran no idioma propio, o que sucede na maioría de países europeos, a práctica podería resultar contraproducente para a aprendizaxe.

Fonte: Europa Press

A Semana da Lingua Rusa en Vietnam comezou o pasado martes día 10 de novembro en Hanoi con actividades animadas por profesores de ruso.

Fonte: Le Courrier du Vietnam

O ministro de Desenvolvemento Económico porteño, Francisco Cabrera, presenta o sitio web "Study in Buenos Aires" que promove esta cidade como destino para aprender o idioma español.

Fonte: InfoBAE

O Goberno de Guinea Bissau aprobou o novo acordo ortográfico da lingua portuguesa nunha sesión extraordinaria do consello de ministros, presidida polo presidente do país, Malam Bacai Sanhá.

Fonte: LUSA

Exipto anunciou o lanzamento do dominio .misr, o primeiro de internet en caracteres árabes. O rexistro do nome, que significa Exipto en árabe, programouse para o luns 16 de novembro a medianoite.

Fonte: AFP

O Ciberdúvidas, un sitio web que responde a cuestións sobre a lingua portuguesa, foi incluído na "Linguist List" da Universidade de Michigan (Estados Unidos), a maior rede social de lingüistas do mundo.

Fonte: Lusa