A lingua de signos portuguesa foi recoñecida como lingua da comunidade xorda portuguesa pola Constitución da República en 1997. Calcúlase que existen cerca de 30.000 falantes nativos da lingua de signos portuguesa.

Fonte: Sapo

A sinalización das rúas de Cornualles traducirase á lingua tradicional da rexión, malia que só 300 persoas a falan. As instalacións do concello tamén modificarán a súa sinalización e pediráselles aos concelleiros que consideren a posibilidade de utilizar o córnico en todas as futuras publicacións, literatura promocional e a súa páxina web.

Fonte: Telegraph

O éuscaro sería a lingua máis difícil de aprender, por encima do chinés, do húngaro, do xaponés ou do ruso, segundo varios diplomáticos de 23 países diferentes consultados polo Goberno británico.

Fonte: EiTB

A Oficina Nacional de Procesos Electorais (ONPE) de Perú desenvolve unha capacitación electoral dirixida aos membros de mesa, que nalgunhas circunscricións se fai en castelán e en linguas nativas.

Fonte: Los Andes

Un deputado irlandés cuestionou os gastos que supón pasar toda a documentación oficial da república ao gaélico, cando, segundo el, estes documentos non os le ninguén no idioma nacional da illa.

Fonte: Mondivers

Google anunciou recentemente no seu blog oficial novas funcionalidades e un novo aspecto para Google Translate, que agora inclúe a conversión de texto a voz, traducións en tempo real e transcricións fonéticas para un conxunto de linguas, entre elas o chinés, o árabe e o persa.

Fonte: ISEDB

Jimmy Wales, o fundador de Wikipedia, explicou na BBC o estado do desenvolvemento da enciclopedia participativa en África. Segundo el, a posta en marcha de edicións en linguas vernáculas africanas é difícil pero necesario para garantir o acceso á cultura dun maior número de persoas.

Fonte: Afrik.com

A Secretaría Xeral de Política Lingüística da Consellería de Educación e Ordenación Universitaria da Xunta de Galicia participou na Expolingua Berlín 2009, un dos maiores escaparates das linguas no mundo. Na súa vixésimo segunda edición, esta feira internacional das linguas contou cun total de 204 expositores, a través dos que estiveron representados 31 países.

Fonte: Xunta de Galicia

O Fondo de Poboación das Nacións Unidas en Bolivia (UNFPA), coa colaboración do Ministerio de Relacións Exteriores e o Fondo Indíxena, presentará os contidos do seu novo espazo web nos catro idiomas máis usados en Bolivia: español, quechua, aimará e guaraní.

Fonte: El Deber

En Lhasa, a capital de Tíbet, celebrouse unha cerimonia co fin de conmemorar o lanzamento dun proxecto de investigación para o servizo de mensaxes curtas na lingua tibetana. Este proxecto ten como obxectivo facer posible enviar mensaxes curtas nesta lingua.

Fonte: China Tibet Online