A organización que representa os avogados de Canadá votou a súa oposición ao proxecto de lei federal que esixe que todos os xuíces do Tribunal Supremo de Canadá sexan bilingües.

Fonte: The Gazette

Brasil creou un servizo gratuíto para resolver dúbidas de lingua portuguesa por teléfono, o Plantão Gramatical de Língua Portuguesa, tamén chamado Telegramática. O obxectivo do servizo, segundo as autoridades, é enriquecer a aprendizaxe da lingua portuguesa.

Fonte: Público

Enxeñeiros da Universidade de Washington presentaron o proxecto MobileASL, que ten como obxectivo facilitarlles o uso dos teléfonos móbiles ás persoas xordas ou con problemas auditivos.

Fonte: Gadget Reviews

O Ministerio de Educación está a piques de poñer en marcha un programa para ensinar a lingua chinesa no nivel escolar en Sri Lanka, segundo afirmou o ministro de Educación, Bandula Gunewardana. É fundamental ensinarlles o chinés aos estudantes de Sri Lanka, porque será unha das linguas do futuro, salientou.

Fonte: LankaNewspapers

O Ministerio de Xustiza envioulles unha carta aos presidentes e administradores dos tribunais estatais para aclararlles a obriga que teñen os que reciben axuda financeira do Goberno federal de proporcionar servizos lingüísticos de interpretación, tradución e outros ás persoas cun coñecemento limitado de inglés.

Fonte: Media Newswire

O Goberno indio afirmou que está destinando fondos a protexer as linguas tradicionais das minorías. O ministro de Asuntos das Minorías informou de que o Instituto Central das Linguas Indias, Mysore, conta con varios programas para a recollida de datos, a descrición, a documentación e a produción de materiais nalgunhas destas linguas.

Fonte: Web Newswire

A Secretaría de Desenvolvemento Rural e Equidade para as Comunidades (Sederec) traduciu 32 documentos oficiais, entre programas, leis e folletos, ao náhuatl, como parte das accións para preservar a lingua e facilitarlles aos falantes o acceso á información pública.

Fonte: El Universal

Os inmigrantes que queiran vivir en Canadá terán que pasar agora un novo exame de lingua inglesa para comprobar que as súas competencias lingüísticas son suficientes. O ministro de Cidadanía e Inmigración, Jason Kenney, afirmou que se lles denegará a entrada en Canadá ás persoas que soliciten un visado e non realicen o exame.

Fonte: Global Visas

Aproximadamente 40 millóns de persoas aprenden mandarín fóra de China, segundo afirmou o director dunha organización que promove a lingua e a cultura chinesas.

Fonte: China Daily

Unha enquisa realizada en Nova Zelandia revelou que a xente nova amosa un apoio firme ao ensino obrigatorio do maorí. Máis dun terzo dos enquisados que apoia as clases obrigatorias desta lingua tiña menos de 35 anos.

Fonte: Australia Network News