Algunhas familias asiáticas loitan por reter a súa lingua materna cando os seus fillos e netos acoden a escolas de fala inglesa. Pero as escolas complementarias que lles aprenden aos nenos as linguas dos seus devanceiros poderían equilibrar a balanza.

Fonte: BBC

O Goberno alemán presentou un programa de integración dos inmigrantes na sociedade que inclúe máis horas lectivas de cursos de alemán e profesores con maior experiencia previa no ensino a estranxeiros.

Fonte: El Periódico

Máis dunha cuarta parte dos tradutores que traballan xunto cos soldados americanos en Afganistán suspendeu os exames de competencia lingüística, pero enviáronos igualmente ao campo de batalla.

Fonte: The Huffington Post

O Tribunal de Xustiza da Unión Europea (TUE) desestimou un recurso presentado polo Goberno de España para defender o uso do español nas institucións comunitarias ao mesmo nivel que o inglés, o francés ou o alemán.

Fonte: El Mundo

O próximo ano publicarase o primeiro dicionario do idioma xichangana, o máis falado no sur de Mozambique, tamén presente en África do Sur e en Zimbabwe. Catro investigadores do Centro de Estudos Africanos da Universidade Eduardo Mondlane traballan no proxecto, que é o primeiro destas características no país.

Fonte: Vermelho

A comisaria europea de Educación, Cultura, Plurilingüismo e Xuventude, Androulla Vassiliou, amosouse “plenamente satisfeita” pola política lingüística que está a desenvolver a Xunta de Galicia. Así llelo trasladou ao conselleiro de Educación e Ordenación Universitaria, Xesús Vázquez, e ao secretario xeral de Política Lingüística, Anxo Lorenzo, durante a reunión que mantiveron en Bruxelas.

Fonte: Xunta de Galicia

Tan só o 7 % dos ucraínos coloca a situación do ruso na lista dos 25 problemas principais que máis lle afectan, segundo as enquisas realizadas en 2008 e 2009. O autor destas, o experto en política Oleh Medvedev, afirma que as enquisas están baseadas en investigacións sociolóxicas e en estatísticas de entidades e institucións públicas, ONG e sindicatos, así como nas valoracións de expertos.

Fonte: ZIK

Xeorxia introduciu clases de inglés obrigatorias nas súas escolas nun intento do seu Goberno pro-occidental por desvincular o país da esfera xeopolítica da veciña Rusia.

Fonte: Telegraph

As autoridades educativas de Bolivia alertaron sobre o perigo de extinción de linguas nativas e adiantaron que o tema formará parte do contido de futuros programas de ensino.

Fonte: Prensa Latina

Un total de 56 diplomáticos de 26 embaixadas estranxeiras en China inscribiuse para participar nun programa de aprendizaxe da lingua chinesa, de dez semanas de duración, que se realizará na sede do Instituto Confucio/Hanban.

Fonte: Xinhua