Existen 39,4 millóns de usuarios en internet que falan coreano, o que representa un 2 % do total do mundo. O coreano sitúase como a décima lingua máis empregada en internet, segundo os datos publicados por Internet World Stats en xuño de 2010.

Fonte: The Korea Herald

Sete linguas indíxenas foron recoñecidas legal e oficialmente polo Estado panameño, segundo publica o Boletín Oficial. Esta nova norma estableceuse nunha lei que recoñece a "diversidade cultural como un valor histórico e patrimonio da humanidade".

Fonte: Radio Nacional de Venezuela

As autoridades educativas da rexión autónoma do Tíbet, no suroeste de China, afirmaron que todos os nenos das zonas agrícolas e de pastoreo do Tíbet recibirán polo menos dous anos de educación infantil gratuíta tanto na lingua tibetana como en chinés mandarín en 2015.

Fonte: Xinhuanet

Un curso gratuíto con clases de gaélico manx desenvolverase no Aninovo como parte dun esforzo continuado para ensinarlle á xente o patrimonio da illa. As clases, organizadas pola Fundación Patrimonio Manx, centraranse na comunicación oral en gaélico.

Fonte: BBC

Os estudantes matriculados nas clases de árabe, coreano e chinés amosan o rápido incremento destes idiomas entre os cursos de linguas estranxeiras nas universidades de Estados Unidos, aínda que o español continúa sendo a lingua máis estudada cunha ampla marxe, segundo indica un estudo.

Fonte: Los Angeles Times

O ministro de Linguas Nacionais e Integración Social, Vasudeva Nanayakkara, afirmou que debe promoverse unha política trilingüe entre a xente nova para garantir a unidade entre comunidades.

Fonte: Daily Mirror

Vinte linguas faladas no Reino Unido, incluíndo a lingua de signos Old Kentish, desapareceron ou están en perigo de extinción nunha xeración, segundo profesores de universidade que están intentando deter a súa desaparición.

Fonte: Telegraph

Persoas con diversas discapacidades celebraron o Día Mundial da Discapacidade, e as que teñen problemas auditivos pediron o recoñecemento legal da lingua de signos na India.

Fonte: Hindustan Times

O ministro de Patrimonio, Alun Ffred Jones, describiuno "como un día histórico para a lingua galesa", pois o Goberno da Asemblea aprobou o seu primeiro texto lexislativo sobre o idioma galés.

Fonte: BBC

Máis de 40 millóns de persoas de todo o mundo están a aprender chinés, segundo afirmou un alto funcionario da sede do Instituto Confucio na organización do quinto congreso anual en Pequín.

Fonte: Xinhuanet