Con motivo da cerimonia inaugural do Congreso internacional de profesores de lingua e literatura persas que tivo lugar na Universidade de Teherán, o xefe de gabinete da Oficina Presidencial de Irán propuxo a creación dunha academia conxunta de tres países de lingua persa: Irán, Taxiquistán e Afganistán.

Fonte: Tehran Times

"O ensino non pode deixar fóra a lingua materna" foi a mensaxe dos estudantes kurdos que iniciaron unha mobilización nas universidades despois dun boicot dunha semana nos centros de educación primaria e secundaria nas rexións de maioría kurda en Turquía. Reclaman un dereito simple e natural: acceder ao ensino en lingua kurda.

Fonte: Kurdish Globe

Con motivo dunha conferencia internacional sobre linguas en Xamaica, cincuenta importantes académicos e lingüistas caribeños asinaron un documento que avoga por unha maior inclusión das linguas crioulas nos sistemas educativos nacionais, na esfera política e nas oficinas gobernamentais da zona.

Fonte: Caribbean News Digital

Activistas da lingua galesa interromperon a inauguración do centro de arte Pontio en Bangor ante a inexistencia de requisitos de competencia en galés para os candidatos que aspiren a traballar no centro.

Fonte: Daily Post

Indios americanos de Alasca e a empresa de software Rosetta Stone colaboraron nun proxecto para ensinar a lingua inupiaq, falada con fluidez por 1.500 persoas. O proxecto preservará as voces e competencias lingüísticas dos seus falantes.

Fonte: UPI.com

O líder da Fronte Progresista India (IPF), partido político que representa a comunidade india en Malaisia, reclamou ao ministerio de finanzas malaisiano a aprobación dunha directiva que garanta o uso da lingua támil nas operacións bancarias.

Fonte: Newstrack India

A constitución surafricana aprobada en 1996 establece como oficiais 11 idiomas e considera que non pode existir discriminación por razón de lingua. Porén, nos últimos anos, a importancia do inglés estase facendo preponderante, as novas xeracións falan máis esta lingua e enfróntanse a unha realidade na que as linguas nativas son cada vez menos útiles socialmente.

Fonte: il Post

A Secretaría de Pobos Indíxenas do estado mexicano de Michoacán (SPI) e o Instituto Nacional de Linguas Indíxenas (INALI) asinaron un acordo para crear un organismo que se centrará na promoción, protección e desenvolvemento das linguas indíxenas.

Fonte: MiMorelia.com

Arredor de 250 estudantes de ensino secundario da provincia italiana de Udine cursarán durante tres meses materias curriculares como Física, Sistemas Eléctricos, Historia, Literatura Grega e Ciencias en friulano. Esta iniciativa forma parte dun proxecto piloto que aspira a introducir a lingua friulana na educación e está financiado pola Provincia de Udine, a Universidade Ca' Foscari de Venecia e a Universidade de Udine, entre outros.

Fonte: il Friuli.it

Máis de 80 académicos asinaron unha carta dirixida a Michael Russell, o secretario de educación escocés, que reivindica a obrigatoriedade da literatura escocesa no sistema educativo e reclama a introdución da lingua escocesa (ou Scots) nas escolas.

Fonte: STV