Grazas a un único programa lingüístico os alumnos dalgunhas escolas públicas de Portland, no estado estadounidense de Oregón, están inmersos na lingua xaponesa desde a gardería ata o ensino secundario. A intención dos programas de inmersión lingüística é que os estudantes estean rodeados da lingua e isto resulta beneficioso para eles, xa que tanto o seu rendemento académico, como a súa habilidade para aprender unha terceira ou unha cuarta lingua son maiores.

Fonte: WRAL.com

Un grupo de arredor de 200 estudantes de lingua irlandesa congregouse na sede do partido Fine Gael para protestar contra a iniciativa que aspira a converter o irlandés en lingua optativa no ensino. Os manifestantes cubriron a súa boca con cinta adhesiva nun acto simbólico contra a proposta que consideran "totalmente prexudicial para a lingua".

Fonte: Irishtimes

As autoridades chinesas prevén a posta en marcha do primeiro exame de nivel para certos estudantes e traballadores da lingua da etnia zhuang, a segunda maior do país tras os Han. A Comisión Estatal de Asuntos Étnicos afirmou que a medida ten por obxecto promover o uso desta lingua que, a diferenza doutras linguas de grupos étnicos minoritarios, segue a ser de uso corrente e estendido.

Fonte: People's Daily Online

Expertos chegados de todos os puntos do territorio federal de Nunavut (Canadá) reuníronse en Iqaluit para debater acerca do espiñoso problema ao que lingüistas e educadores se levan enfrontado durante máis de medio século: como crear unha norma da lingua inuit que poida ser comprendida en todas as rexións do territorio.

Fonte: The Vancouver Sun

O Consello de Ministros da Unión Europea aprobou a creación dun novo sistema de patentes unificado que simplifica o réxime lingüístico para reducir custos e limítao só a tres linguas: inglés, francés e alemán. A decisión adoptouse por maioría cualificada, cos únicos votos en contra de España e Italia, que consideran as súas linguas discriminadas inxustamente.

Fonte: El Periódico

Microsoft lanzou o sistema operativo Windows 7 en suahili co obxectivo de que máis de 150 millóns de falantes desta lingua, tanto en Kenya como noutros países de África, poidan ter acceso a unha gama máis ampla dos seus produtos informáticos na súa lingua.

Fonte: Mwakilishi.com

Aprender inglés abre cada vez máis portas a unha maior calidade de vida na India. Na sociedade india actual, o inglés é unha lingua esencial para conseguir empregos cualificados e úsase cada vez máis como medio de comunicación entre cidadáns indios de diferentes estados.

Fonte: SOS CHILDREN'S VILLAGES

Varios estudos dirixidos por Susan Goldin-Meadow, profesora de psicoloxía da Universidade de Chicago, demostran que a falta de habilidades lingüísticas pode dificultar a comprensión dos conceptos máis esenciais das matemáticas.

Fonte: Education Week

Un estudo de investigación dirixido por científicos canadenses advirte que a aprendizaxe e a práctica habitual de linguas estranxeiras pode contribuír á prevención do alzhéimer máis que calquera fármaco dispoñible para o tratamento da enfermidade.

Fonte: The Australian

Estudos recentes elaborados na Universidade Estatal de Pensilvania (EUA) demostran que os falantes bilingües avantaxan as persoas que só falan unha lingua nalgunhas habilidades mentais, como por exemplo a capacidade de ignorar datos irrelevantes para concentrarse na información esencial.

Fonte: Bloomberg Businessweek