A directora da Escola Portuguesa de Macau reafirmou o obxectivo da institución de formar estudantes trilingües en portugués, inglés e chinés para que estes poidan ingresar ao final dos seus estudos en "calquera universidade do mundo".

Fonte: Mundo Português

Un novo estudo elaborado por expertos lingüistas da Biblioteca Británica revela que o inglés británico goza de boa saúde e que moitos falantes británicos rexeitan as pronuncias americanas das palabras da fala diaria.

Fonte: Mail Online

Un crecente número de lingüistas alemáns teme que a súa lingua estea en perigo de morte ante a riada de anglicismos que están a inundar o vocabulario xermano. A Asociación da Lingua Alemá (VDS) presaxia que o alemán podería converterse nunha lingua "periférica" se non se toman as medidas axeitadas para protexelo contra os préstamos estranxeiros.

Fonte: Guardian

A Fundación da Lingua de Kadazandusun (KLF) organizará o primeiro seminario da lingua murut que inaugurará un proxecto piloto de tres anos co obxectivo de introducir o ensino desta lingua nas escolas primarias do municipio de Tenom en Malaisia.

Fonte: Daily Express

Harry Oohsawee espera que as últimas tecnoloxías ofrezan un modo de evitar a desaparición da lingua cheroqui. Con este fin, ofreceu o seu apoio a unha empresa especializada no deseño de aplicacións destinadas á revitalización de linguas nativas norteamericanas.

Fonte: Muskogee Phoenix

O comisario de Política Lingüística de Irlanda, Sean O Cuirreain, propuxo que o ensino do irlandés se faga por medio de dúas materias independentes no futuro. Unha destas materias sería un curso comunicativo que se centraría nas habilidades da escrita, lectura e produción oral. A outra materia estaría destinada a alumnos que mostren un interese natural pola lingua con contidos relacionados, entre outros, coa literatura, a poesía ou o teatro. Esta iniciativa suporá un cambio no ensino da lingua vernácula en todo o país.

Fonte: Independent

Investigadores da Universidade de Ottawa recompilarán unha historia completa da lingua francesa en América do Norte mediante unha crónica de testemuños familiares durante os últimos 400 anos para ver como o francés configurou as comunidades canadenses, a cultura e o país.

Fonte: Social Sciences and Humanities Research Council

A etnia mundurucu conta con 11.630 individuos distribuídos en territorios dos estados brasileiros do Pará, Amazonas e Mato Grosso. Por primeira vez, un curso específico, desenvolvido pola Universidade Federal do Amazonas, terá a función de formar educadores en mundurucu. A intención é garantir a preservación da lingua e cultura dese pobo.

Fonte: Portal Universidade

A carencia de habilidades en lingua estranxeira segue a ser un problema entre a man de obra vietnamita dos servizos da informática. Un estudo elaborado en dez empresas de software do país mostrou que só un 25-40 % dos traballadores cumpren os requisitos de coñecemento en lingua estranxeira.

Fonte: VietNamNet

En Tangran, unha cidade do centro da China, localizada no extremo da meseta tibetana, carteis de gran tamaño anuncian que dez millóns de dólares se investirán na construción de relucentes oficinas, centros culturais e un estadio. Trátase dun proxecto de desenvolvemento financiado polo estado co que Pequín quere levar unha mellor calidade de vida á cidade. Porén, os sinais están escritos só en chinés mandarín. Para os tibetanos que non poden ler mandarín, trátase dunha información sen sentido. Para outros, é un recordatorio de que, aínda que os tibetanos constitúen a poboación predominante da zona, a etnia han, a maioría do estado, é a que manda.

Fonte: Newsobserver