O líder espiritual hindú, Swami Ramdev, apoiou a consideración das linguas rexionais konkani e maratí como linguas de instrución nas escolas do estado indio de Goa. A súa reacción de apoio prodúcese no medio dun fervoroso debate sobre a posibilidade de converter o inglés na principal lingua da educación pública do estado indio.

Fonte: Prokerala News

Cidadáns indíxenas residentes no Distrito Federal de México esixen atención sanitaria, educación e xustiza nas súas linguas nativas, en cumprimento das leis que protexen os dereitos das comunidades indíxenas.

Fonte: El Universal

Unha campaña iniciada en Nova Zelandia demanda que algunhas linguas orixinarias do Pacífico sexan declaradas oficialmente idiomas minoritarios no país insular. Un total de 4.000 persoas asinaron xa a petición dirixida ao parlamento en apoio do niuano, o maorí das Illas Cook, o toquelauano, o samoano e o tongano.

Fonte: Radio New Zealand

O Goberno malaisiano pretende incrementar o número de profesores de mandarín no ensino en todo o país. O primeiro ministro, Najib Razak, indicou que o plan é parte dos esforzos que está a facer o goberno por incidir na preservación da cultura chinesa e recoñecer o programa baseado nos Certificados Unificados de Exames nas escolas de lingua vernácula chinesa.

Fonte: New Straits Times

Un novo informe do Instituto Asiático da Universidade de Melbourne mostra que o número de inscricións en cursos de lingua árabe se multiplicou por seis na Universidade Nacional de Australia e case se duplicou nas universidades de Sydney e Melbourne.

Fonte: The Australian

O líder da tecnoloxía mundial Google incorporou a lingua escrita cheroqui ao seu repertorio de linguas. De igual maneira que o resto de linguas que inclúe Google no seu motor de busca, agora todos os falantes de cheroqui que poden ler e escribir na súa lingua poden facer buscas de calquera tema na rede de alcance mundial.

Fonte: Your Industry News

O Instituto Camões asinou un protocolo coa empresa Priberam, que fornece ferramentas lingüísticas para a lingua portuguesa, para dinamizar a aplicación do Acordo Ortográfico en todo o mundo.

Fonte: Expresso

Os departamentos universitarios de linguas advirten que o incremento das taxas de matrícula nas universidades inglesas podería pór en risco a inscrición dos estudantes. Moitas carreiras de linguas inclúen un ano extra no estranxeiro e témese que os estudantes non estean dispostos a pagar ata 36.000 libras esterlinas por cursar un cuarto ano. Os departamentos de linguas están preocupados ante a falta de solicitudes e, dada esta situación, algunhas universidades están xa consultando a posibilidade de retirar da súa oferta a totalidade das carreiras de linguas modernas.

Fonte: BBC

De acordo cun estudo publicado por EF English First, o maior centro de ensino de inglés do mundo, os países escandinavos son os que ocupan o primeiro lugar en dominio desta lingua, mentres que Rusia, Turquía e os países suramericanos ocupan os últimos lugares de competencia.

Fonte: Reuters

A maioría dos candidatos nas próximas eleccións parlamentarias en Finlandia apoia a supresión do sueco como lingua obrigatoria no sistema educativo. Máis da metade dos candidatos de todos os partidos, a excepción do Partido Popular Sueco (SFP), estaría a favor de converter a lingua sueca en materia optativa. En total, un 62,5 % apoia esta iniciativa.

Fonte: Helsinki Times