Un recente estudo indica que as 6.000 linguas modernas do mundo poderían ter descendido dunha única lingua ancestral falada por humanos prehistóricos de África hai entre 50.000 e 70.000 anos.

Fonte: The Wall Street Journal

Un estudo revelou que o árabe é, despois do inglés, a lingua máis falada pola xente nova en Australia. Un de cada oito nenos multilingües emprega esta lingua no ámbito familiar.

Fonte: Gulfnews

O hotel Gwesty Carreg Môn, en Anglesey, no norte de Gales, emitiu unha norma pola que prohibe falar galés ao persoal de cociña porque o seu principal responsable non fala nin entende esta lingua. A dirección do hotel afirma que tomou esta decisión "unicamente por razóns de seguridade" para garantir o bo funcionamento do servizo de restauración.

Fonte: Daily Post

O presidente de Xeorxia, Mikheil Saakashvili, apoiará a aprobación dun programa que requirirá unha aprendizaxe máis exhaustiva da lingua xeorxiana para a poboación de orixe non xeorxiana.

Fonte: News.am

A Xunta de Galicia, a través da Secretaría Xeral de Política Lingüística, súmase ao recoñecemento da diversidade lingüística. O departamento que dirixe Anxo Lorenzo vén de participar na primeira reunión sobre o proxecto “Lingua e falantes por unha Europa diversa”, promovido pola Rede para a Promoción da Diversidade Lingüística (en inglés, Network to Promote Linguistic Diversity).

Fonte: Xunta de Galicia

O lingüista João Malaca Casteleiro, da Academia de Ciencias de Lisboa, cre que o portugués podería converterse na sétima lingua oficial da Organización das Nacións Unidas (ONU) nos próximos cinco anos, grazas á grande proxección do Brasil no panorama internacional e á posibilidade de que este se converta en membro permanente do Consello de Seguridade das Nacións Unidas.

Fonte: Café Portugal

Institucións públicas e privadas de toda Macedonia continúan rexeitando a sinalización en albanés a pesar de que case o 30 % da poboación deste país balcánico é de orixe albanesa.

Fonte: Albeu

De acordo coas últimas estatísticas do ámbito cultural publicadas en Bruxelas, máis da metade da poboación maltesa le xornais nunha lingua estranxeira. Cunha porcentaxe do 56 %, trátase da media máis alta na Unión Europea despois da rexistrada en Luxemburgo (71 %).

Fonte: Times of Malta

Falantes de chokwe, unha das linguas nacionais de Angola, residentes nas provincias de Moxico, Lunda Norte, Lunda Sur, Malanxe, Bié e Kuando Kubango desenvolverán un obradoiro para abordar a problemática da normativización da súa lingua materna.

Fonte: Angop

As Nacións Unidas celebraron o Día da Lingua Chinesa como parte dos esforzos constantes da organización de destacar a importancia histórica e cultural de cada unha das súas seis linguas oficiais.

Fonte: UN News Centre