Mundo
O servizo de tradución en liña Linguee está dispoñible en novas combinacións lingüísticas
Desde 2010, o servizo de tradución en liña Linguee é o dicionario electrónico coa maior base de datos do mundo e xa recibiu máis de mil millóns de consultas. Linguee lanza agora as combinacións portugués-español, portugués-francés e portugués-alemán, entre outras.
Os pobos indíxenas de Ecuador reclaman apoio para evitar a desaparición das súas linguas
Varios pobos indíxenas de Ecuador reclaman o cumprimento de normas constitucionais para que non desaparezan as súas linguas ancestrais. Mesmo o quechua, a segunda lingua oficial do país despois do castelán, corre ese perigo, dixo Fernando Cabascango, integrante da organización Quichuaestudio, que promove investigacións e o ensino dese idioma.
Fonte: RPP
Preséntase unha campaña para a promoción do catalán de Alguer
A campaña de sensibilización “En alguerés, té més gust” ("En alguerés, presta máis"), un proxecto conxunto do Espai Llull da Generalitat de Cataluña en Alguer e o Concello desta localidade italiana, ten como obxectivo prioritario promover o uso social do catalán de Alguer.
Fonte: Generalitat de Catalunya
O uso da lingua rusa no Parlamento ucraíno orixina unha forte disputa entre os deputados
O uso da lingua rusa por parte dun representante do partido gobernante foi a causa dunha liorta entre un grupo de deputados do Parlamento ucraíno.
Fonte: The Inquisitr
Faltan profesores bilingües en California
A Asociación de Educación Bilingüe en California (CABE) estima que no estado hai 1,3 millóns de nenos e nenas en proceso de aprender inglés. "É incriblemente importante o labor dun mestre bilingüe para que o estudante poida comunicarse na escola. Os rapaces aprenden o inglés a través do seu propio idioma e terán maior éxito académico se tiveren un mestre bilingüe", dixo Jan Corea, presidenta da CABE.
Fonte: La Opinión
Portugal e Francia asinan un novo acordo lingüístico ata finais de ano
Portugal e Francia asinarán ata finais de ano un novo acordo de cooperación lingüística que reafirmará o compromiso dos dous países para promover reciprocamente o ensino do portugués e do francés. Ademais, o novo acordo introduce cambios en ámbitos como a avaliación, a certificación ou a contratación de profesores.
Fonte: Notícias ao minuto
O Acordo Ortográfico da Lingua Portuguesa mantén dividida a sociedade civil lusófona
A ratificación e adopción do Acordo Ortográfico da Lingua Portuguesa ten ensombrecido nos últimos anos o panorama lusófono. Non parece claro que exista unha vontade xeral para aceptar as novas regras, a pesar de que os oito países lusófonos acordaran en 2010 o fundamento do Acordo para toda a Comunidade dos Países de Lingua Portuguesa.
Fonte: Lusomonitor
A Academia Francesa oponse a un proxecto que promoverá os cursos en linguas estranxeiras
A Academia Francesa pídelles aos lexisladores que renuncien a un proxecto de lei que pretende incentivar o éxito académico por medio da introdución de cursos en lingua estranxeira, xa que marxina a lingua francesa.
Fonte: Le nouvel Observateur
Lhasa TV lanza unha canle de televisión en lingua tibetana
A televisión Lhasa TV da Rexión Autónoma do Tibet en China lanzou unha canle en lingua tibetana. No Tibet, moitos tibetanos non entenden o chinés mandarín e máis do 80 % dos aproximadamente 2 millóns de gandeiros e pastores ven canles de televisión en lingua tibetana.
Fonte: Shanghai Daily
A negativa do Goberno francés a ratificar a Carta Europea das Linguas Rexionais orixina varias manifestacións sociais
A renuncia do Goberno francés a modificar a Constitución para ratificar a Carta Europea das Linguas Rexionais ou Minoritarias suscitou numerosas protestas na Bretaña e Alsacia.
Fonte: Le Parisien
Boletín
Subscríbase ao boletín