A editorial galesa Y Lolfa enviou unha petición á multinacional Amazon para que permita a publicación en Kindle de libros electrónicos en galés. A iniciativa reuniu xa máis de 2000 sinaturas.

Fonte: Wales Online

Segundo o centro letón de estudos de opinión pública SKDS, preto do 60 % dos cidadáns de Letonia móstrase a favor do ensino da lingua rusa nas escolas.

Fonte: Rádio Voz da Rússia

No medio da selva amazónica brasileira, un equipo de investigadores emprega os teléfonos móbiles para recoller historias da literatura oral e preservar, deste xeito, o patrimonio lingüístico das comunidades indíxenas que corren o risco de desaparecer sen deixar vestixio ningún.

Fonte: Terra

Xeorxia conmemora o 35 aniversario das históricas manifestacións para pedir o status oficial do idioma xeorxiano, demanda que foi satisfeita sorprendentemente polas autoridades soviéticas sen recorrer á forza.

Fonte: El Confidencial

O Concello da cidade sarda de Alguer institucionaliza o uso do catalán e introdúceo nos actos oficiais.

Fonte: Sassari Notizie

O Concello escocés de Glasgow consultará coa cidadanía o borrador do seu programa sobre a lingua gaélica dada a crecente popularidade que esta está a experimentar no ámbito local. O programa é o segundo destas características no concello e pretende levar a lingua gaélica ás persoas que queiran aprendela.

Fonte: Stv News

A Asemblea de Córsega votará unha proposta que podería dar status cooficial á lingua corsa, aínda que sería necesario reformar a Constitución francesa para que a cooficialidade poida entrar en vigor. Os deputados corsos votarán sobre a cuestión durante a próxima sesión da Asemblea.

Fonte: Nationalia

A Organización das Nacións Unidas para a Educación, a Ciencia e a Cultura (Unesco) asinou un acordo de cooperación co Centro Rexional de Documentación sobre as Tradicións Orais e as Linguas Africanas. O pacto reforza a cooperación entre as dúas partes, baseada na súa "experiencia cultural, na salvagarda das linguas e na promoción do patrimonio africano".

Fonte: Fátima Missionária

A lingua mirandesa foi escollida polo Concello portugués de Miranda do Douro como tema central das conmemoracións do Día Internacional de Monumentos e Sitios, nunha iniciativa que este ano está subordinada ao tema "Patrimonio, máis Educación igual a Identidade".

Fonte: RTP Notícias

Un tribunal do noroeste da provincia chinesa de Qinghai condenou oito estudantes tibetanos a unha pena de ata catro anos de cárcere por defenderen os seus dereitos a empregar a lingua tibetana.

Fonte: Radio Free Asia