Mundo
O presidente da República portuguesa defende o potencial económico do portugués
O presidente da República portuguesa defendeu a necesidade de explotar “o potencial económico da lingua portuguesa”, subliñando que esta pode contribuír a proxectar unha visión estratéxica dunha rede global lusófona. “Temos que ser capaces de explotar, con confianza e ambición, o potencial económico da lingua portuguesa”, defende Cavaco Silva a propósito do Día da Lingua Portuguesa e da Cultura da Comunidade dos Países de Lingua Portuguesa (CPLP).
Fonte: Público
O sitio web da policía de Escocia non se pode visualizar en gaélico escocés
O sitio web da policía escocesa emprega a ferramenta de tradución de Google para traducir os seus contidos a 66 linguas diferentes. Porén, entre elas non se atopa o gaélico escocés.
Fonte: Scottish Express
Un departamento da rexión francesa de Mediodía-Pireneos anuncia unha política de sinalización en occitano
O departamento de Tarn, na rexión francesa de Mediodía-Pireneos, anunciou o lanzamento dunha política de sinalización en occitano na entrada das localidades. Esta iniciativa, que pretende preservar a singularidade da lingua vernácula, desenvolverase durante tres anos.
Fonte: La Pòrta d'Òc
Alertan da desaparición de 70 linguas indíxenas en México
Organizacións e grupos indíxenas advertiron o Senado da República de México do risco de desaparición de máis de 70 linguas no país, derivado da migración e o nulo interese que o goberno mostrou por preservalas.
Fonte: Vértigo Político
Unha comunidade indíxena australiana loita por revivir a súa lingua
O 93 % das linguas indíxenas australianas desapareceu. Porén, os membros da comunidade indíxena de Barngarla loitan por revivir a súa lingua. O proxecto, liderado por un investigador da Universidade de Adelaida, consiste en empregar as memorias das persoas anciás e un dicionario elaborado hai 170 anos.
Fonte: World News
Un inmigrante de cada cinco non fala francés no Quebec
Unha enquisa elaborada entre os inmigrantes residentes no Quebec mostra que 160 000 só falan inglés e 43 000 non dominan ningunha das dúas linguas oficiais do Canadá e isto a pesar de que moitos deles chegaron a este país americano nos anos oitenta.
Fonte: Le Devoir
Os habitantes autóctonos do Canadá son cada vez máis numerosos, mais as súas linguas están en declive
Segundo os datos achegados por unha enquisa realizada a nivel nacional en 2011, os habitantes autóctonos do Canadá son cada vez máis numerosos mais as súas linguas están en declive. Porén, o estudo mostra que moitos autóctonos aprenderon a dominar unha lingua autóctona no ensino.
Fonte: La Presse
Un estudo mostra que os idiomas europeos e asiáticos proveñen dunha mesma lingua nai
Sete familias lingüísticas do continente eurasiático, con linguas tan diferentes como o inuit, o támil, o xaponés, o grego e o húngaro, evolucionaron dunha mesma lingua que se falaba en tempos do último período glacial. Esta é a conclusión dunha investigación realizada por diversos investigadores do ámbito da lingüística de diferentes universidades do mundo.
Fonte: New Scientist
A nova lei sobre a descentralización en Francia dedicará un só artigo ás linguas rexionais
O Goberno francés segue mostrando reticencias á hora de dar ás linguas rexionais francesas unha maior presenza nos proxectos de lei. Despois da negativa de ratificar a Carta Europea das Linguas Rexionais ou Minoritarias e a súa escasa presenza na lei sobre a reforma do ensino, o proxecto de lei sobre a descentralización, cun só artigo dedicado a estas linguas, ameaza con decepcionar, unha vez máis, os seus defensores.
Fonte: Eitb
O santuario portugués de Fátima ofrecerá misas en lingua de signos
O santuario portugués de Fátima ofrecerá interpretación en lingua de signos portuguesa para que as persoas con dificultades auditivas poidan participar na eucaristía, anunciou o reitor da institución, Carlos Cabecinhas.
Fonte: Público
Boletín
Subscríbase ao boletín