A valorización da lingua portuguesa continúa a ser un gran problema en Macau, afirmou o presidente da Asociación dos Macaenses, que celebra quince anos con iniciativas culturais, incluíndo o concurso de deseño "Macau, unha casa para todos".

Fonte: Sapo Notícias

Varios centos de persoas participaron en París nunha marcha en defensa da lingua francesa, despois de que 30 asociacións culturais e lingüísticas denunciaran a perda de influencia desta lingua nas áreas diplomática e empresarial.

Fonte: Expresso

A empresa do sector da tecnoloxía Dell lanzou ao mercado dos Estados Unidos un novo ordenador portátil cun sistema operativo e un teclado totalmente en español. Esta opción introduciuse para satisfacer a demanda do crecente mercado integrado pola comunidade hispana, especialmente entre a poboación adulta.

Fonte: Fox News Latino

No Reino Unido, un de cada seis alumnos en primaria e un de cada oito en secundaria falan na casa unha lingua diferente ao inglés. A porcentaxe de crianzas que comezan a escola cun coñecemento relativamente baixo de inglés duplicouse en só unha década.

Fonte: The Telegraph

Cinco novas linguas do subcontinente índico foron incorporadas ao servizo de tradución de Google (Google tradutor), aínda que de momento nunha fase experimental. As linguas son o bengalí, o guxaratí, o canarés, o támil e o telugú.

Fonte: GMA News

O ensino e a investigación do galego amplían a súa dimensión internacional a través das universidades de Birmingham, La Sapienza (en Roma) e Varsovia, grazas ao apoio do Goberno galego.

Fonte: Xunta de Galicia

Os xordos de Nova Zelandia van ter un mellor acceso á terceira lingua oficial do país grazas ao lanzamento dun dicionario multimedia da lingua de signos. A base de datos en liña contén arredor de 4000 signos na lingua de signos neozelandesa, acompañados de debuxos lineais e videoclips para amosar como producir cada un dos signos e como utilizalos en contexto.

Fonte: The New Zealand Herald

O Goberno británico lanzoulle un balón de osíxeno á lingua de Cornualles, que se atopa "en situación crítica", ao darlle financiamento para os próximos tres anos. A antiga lingua fora declarada extinta pola Organización das Nacións Unidas para a Educación, a Ciencia e a Cultura (Unesco) en 2009 para afastala do abismo un ano despois.

Fonte: This is Cornwall

O Diario Oficial da Unión Europea adoptará o Acordo Ortográfico para a lingua portuguesa a partir de xaneiro de 2012, segundo adiantou o responsable do idioma na Dirección Xeral de Tradución da Comisión Europea.

Fonte: Expresso

Un total de vinte e cinco profesores de todo o país realizou un curso inicial de lingua de signos organizado pola Unidade de Necesidades Educativas Especiais do Ministerio de Educación e o Grupo de Apoio aos Xordos.

Fonte: Kaieteur News