Mundo
Un novo Centro de Lingua Portuguesa abre en Xeorxia
O Camões-Instituto da Cooperación e da Lingua Portuguesa inaugura un Centro de Lingua Portuguesa (CLP) na Universidade Estatal Ivane Javakhishvili de Tiflis (Xeorxia). Este CLP contará cunha biblioteca propia, dotada de materiais impresos, multimedia e audiovisuais, así como un espazo destinado ás clases de lingua e cultura portuguesas.
Fonte: DN Portugal
Asinan un convenio en Bolivia para construír un instituto de lingua quechua
O gobernador de Cochabamba (Bolivia), Edmundo Novillo, resaltou a sinatura dun convenio para a construción en Cliza do Instituto de Lingua e Cultura da Nación Quechua “Tomás Katari”, segundo informou a Axencia Boliviana de Información.
Fonte: Los Tiempos
O navegador Firefox xa está dispoñible en 15 linguas indíxenas americanas
A comunidade de Mozilla en México ofrece soporte á tradución e localización do navegador Mozilla Firefox a 15 linguas indíxenas americanas entre as que se atopan, entre outras, o maia do Iucatán, o zapoteco e o náhuatl clásico.
Fonte: El Diario
O ministro da Lingua Galesa pídelles ás autoridades locais que promovan o galés
O ministro da Lingua Galesa no País de Gales, Leighton Andrews, dirixiuse por escrito aos representantes das autoridades locais para pedirlles que traballen conxuntamente co Goberno galés e as comunidades para garantir a prosperidade da lingua galesa.
Fonte: Caerphilly Observer
Unha aplicación brasileira traduce voz a lingua de signos
A aplicación Prodeaf Móvel foi desenvolvida por estudantes da Universidade Federal de Pernambuco (Brasil) e traduce contido oral a lingua de signos. O seu obxectivo é axudar as persoas con deficiencia auditiva a se comunicaren a través do móbil.
Fonte: Oficina da Net
Unha nova lei do territorio canadense de Nunavut concédelle ao inuktitut o status de lingua oficial
A lei de linguas oficiais do territorio canadense de Nunavut entrou en vigor o pasado 1 de abril e establece o inuktitut como lingua oficial, xunto co inglés e o francés. "Este nivel de protección para unha lingua aborixe non ten precedentes en Canadá", declarou un responsable do Departamento de Cultura e Patrimonio do Goberno de Nunavut.
Fonte: Nunatsiaq Online
Unha universidade surafricana contará cun lectorado de portugués
A Universidade de Pretoria, na República de Suráfrica, contará cun lectorado de portugués a partir do próximo ano. Esta é a terceira institución de ensino superior que adopta a lingua portuguesa naquel país.
Fonte: Boas Notícias
Unha caixa de aforros británica suprimirá o seu servizo de atención en galés
Unha entidade pública de aforros británica, National Savings and Investments (NS&I), suprimirá os seus servizos de atención en galés porque custan arredor de 900 libras por cliente falante desta lingua. A entidade declarou que só 107 clientes solicitaron o servizo de atención en galés e que, por tanto, non se trataba dun "uso eficiente dos fondos públicos".
Fonte: BBC
Preséntase un programa de ensino bilingüe en Honduras
O presidente de Honduras, Porfirio Lobo Sosa, estivo presente no municipio hondureño de Villanueva, departamento de Cortés, para presentar a segunda etapa do programa de educación bilingüe en escolas públicas deste municipio.
Fonte: La Prensa
Unha organización a prol do gaélico demanda unha política lingüística que abranga todo o territorio irlandés
Conradh na Gaeilge (A Liga Gaélica) fixo un chamamento aos gobernos de Irlanda do Norte e da República de Irlanda para que aproben unha estratexia de promoción do gaélico que teña en conta a totalidade do territorio de Irlanda.
Fonte: BBC
Boletín
Subscríbase ao boletín