A pesar da impresión negativa que dominou a opinión pública occidental despois do atentado do 11 de setembro de 2001, o árabe continuou a súa expansión en Occidente. En Suíza, a demanda de cursos de árabe está medrando, tanto por parte da comunidade residente árabe como polos propios suízos interesados no idioma.

Fonte: Swissinfo

Co fin de preservar a lingua autóctona, o Goberno de Guam, no Pacífico occidental, introduciu unha lei que requirirá a impartición de máis anos de lingua chamorra nas escolas públicas. No canto de cursar un ano en ensino medio e outro ano en ensino superior, o departamento de educación de Guam aspira a facer obrigatorio o ensino da lingua autóctona durante todos os cursos do ensino medio e dous anos do ensino superior.

Fonte: Guampdn

Con motivo do estudo da exhortación apostólica "Verbum Domini", Julio Cabrera, bispo de Julapa, en Guatemala, presentou a tradución da Biblia ao quiché, a lingua de maior difusión das 22 linguas maias presentes no país centroamericano.

Fonte: Radio Vaticana

O secretario xeral de Política Lingüística, Anxo Lorenzo, presidiu en Oxford o encontro dos centros de estudos galegos de Gran Bretaña e Irlanda. Na xornada, que se desenvolveu no Queen’s College, participaron os responsables e os lectores e as lectoras dos centros de estudos galegos das universidades de Oxford, Birmingham, Bangor e Cork.

Fonte: Xunta de Galicia

As queixas dos pacientes sobre a falta de competencia lingüística dos médicos estranxeiros na lingua oficial dos países da Unión Europea fai pensar nunha mudanza nos requisitos lingüísticos para os médicos que aspiren a exercer a profesión nun país do Espazo Económico Europeo, que inclúe, ademais dos 27 estados membros da Unión Europea, os países de Noruega, Islandia e Liechtenstein.

Fonte: CMAJ

A antiga polémica sobre a normativización da lingua retorrománica ou romanche xurdiu de novo con sorprendente forza no cantón de Graubünden, onde se fala esta lingua. A variedade estándar, coñecida como romanche grisón (RG), está a ser introducida gradualmente co fin de incrementar o coñecemento da lingua nas escolas primarias e parece que acabará por suplantar os dialectos rexionais. Porén, os opositores do RG como lingua de instrución constituíron agora un grupo de presión que defende a aprendizaxe dos dialectos.

Fonte: Swissinfo

A lexislación en materia lingüística de Quebec establece que a lingua oficial desta provincia canadense é o francés. Malia isto, accionistas nativos de lingua francesa dalgunhas empresas quebequesas non poden obter a documentación nesta lingua.

Fonte: CTV News

O alumnado xaponés de entre 10 e 12 anos recibirá clases de lingua estranxeira obrigatorias o que alenta as esperanzas dos educadores e os membros da comunidade empresarial de deixar atrás décadas de déficit no coñecemento da lingua inglesa.

Fonte: Guardian

Alén do portugués e do mirandés oficiais, en Portugal fálanse tamén outras variedades lingüísticas creadas por determinados grupos profesionais que están a caer en desuso e que non gozan de recoñecemento oficial.

Fonte: Sol

O recoñecemento oficial do mirandés como segunda lingua de Portugal ditou a necesidade de elaborar os primeiros manuais de estudo e normalización deste idioma, o que deu como resultado a publicación da “Convención Ortográfica da Lingua Mirandesa”.

Fonte: Correio do Minho