O líder do partido de Jharkhand Disom na India reclamou o recoñecemento do santali como primeira lingua no estado de Jharkhand, no leste do país. Ademais, engadiu que noutros estados indios a lingua santali conta cun bo número de falantes, polo que debería recibir o status de segunda lingua nos estados respectivos conforme ao artigo 347 da Constitución da India.

Fonte: The Times of India

O ministro cimbabués de Educación, David Coltart, defendeu a necesidade de contar con profesores que sexan competentes nas linguas locais sesotho, venda, kalanga e ndebele nas rexións Matabeleland. "Os alumnos deben poder aprender na lingua que os seus pais falan con eles, xa que constitúe a base da súa aprendizaxe. Se non lles dan esa oportunidade, a súa educación verase prexudicada", afirmou.

Fonte: News Day

O futuro do español está garantido, sobre todo nos Estados Unidos. Así o manifestou o lingüista e secretario xeral da Asociación de Academias da Lingua Española, Humberto López Morales, ao afirmar que esta é “hoxe a cuarta lingua máis falada do planeta” e “é moi posible que en tres ou catro xeracións o 10 por cento da poboación mundial se entenda en español”.

Fonte: Levante-emv.com

Dous investigadores do Departamento de Educación Especial da Universidade de Haifa desenvolveron un estudo que mostra que os alumnos que coñecen dúas linguas teñen máis facilidades para acadaren o dominio dunha terceira cás persoas monolingües.

Fonte: OneIndia

A empresa Microsoft, o Instituto de Lingüística Teórica e Computacional e a Asociación da Lingua Mirandesa están a desenvolver un proxecto tecnolóxico innovador para preservar o ensino e a divulgación do mirandés, a segunda lingua oficial de Portugal.

Fonte: Diário Digital

Aínda que o Ministerio de Educación checo introduciu cursos de lingua, cultura e historia romanís en escolas de ensino primario e secundario, estes non se están a impartir en ningunha escola e, segundo expertos de asuntos relacionados co pobo xitano, a comunidade romaní parece non mostrar interese na iniciativa.

Fonte: České Noviny

Por primeira vez desde 1993, a lingua corsa escoitarase durante o festival da canción de Eurovisión. Amaury Vassili, o representante francés deste ano, realizará a súa intervención musical nesta lingua.

Fonte: Esctoday.com

Aínda que o árabe é a segunda lingua máis falada de Francia, está escasamente representada na educación pública. No ano 2009, só 6.000 alumnos (dun total de 5 millóns) cursaron clases nesta lingua, unha porcentaxe do 0,1 % que parece insignificante se a comparamos co 97,9 % dos alumnos que cursaron inglés ou o 41 % que cursou español.

Fonte: Le Figaro

A Organización das Nacións Unidas para a Educación, a Ciencia e a Cultura (Unesco) engadiu o dialecto jeju ao seu atlas das linguas en perigo. O organismo internacional afirmou nun comunicado que o jeju “é unha lingua seriamente ameazada e que conta con non máis de 10.000 falantes na Illa de Jeju na República de Corea do Sur".

Fonte: The Jeju Weekly

O Goberno francés rexeitou de novo unha lei a favor das linguas rexionais en Francia. O deputado socialista alsaciano Armand Jung declarou ao ministro de Educación na Asemblea Nacional que a referencia ás linguas rexionais na constitución francesa é "unha farsa".

Fonte: Le Journal du Pays Basque/Euskal Erriko Kazeta