Mundo

Un festival promove o intercambio cultural entre os países de lingua portuguesa

Entre os días 21 e 30 de agosto, Río de Xaneiro celebrará o Festival de Teatro da Lingua Portuguesa, que alén de obras teatrais, ofrecerá espectáculos, exposicións, obradoiros e debates. Este ano o festival presenta sete espectáculos inéditos do Brasil, Angola, Cabo Verde, Mozambique e Portugal. Nesta edición o festival conta ademais coa participación especial de Timor Leste e de Guinea-Bissau.

Fonte: Catraca Livre

Libia recoñece o tamazight, o tuareg e o tubu como linguas nacionais

Unha lei aprobada polo Congreso Nacional de Libia recoñece as linguas tamazight, tuareg e tubu como variedades lingüísticas e culturais da sociedade libia e estipula o seu ensino nos programas escolares do país.

Fonte: Maghreb Emergent

O uso de idiomas distintos ao inglés medra nos Estados Unidos

O número de persoas en Estados Unidos que falan un idioma diferente ao inglés na casa practicamente se triplicou nas últimas tres décadas, superando amplamente o aumento da poboación xeral, segundo datos oficiais. Aínda que o español segue a ser o idioma máis falado despois do inglés, outras linguas, particularmente as do sur de Asia e África, incrementaron o seu uso, dixo a Oficina do Censo de Estados Unidos nun relatorio.

Fonte: Terra

Alxeria apoiará o ensino da lingua turca nas universidades, mais seguirá sen recoñecer oficialmente o tamazight

Aínda que Alxeria segue sen recoñecer oficialmente a lingua tamazight (bérber), dúas das principais universidades do país introducirán o ensino da lingua turca.

Fonte: Siwel

As linguas vernáculas impulsan o crecemento da Wikipedia na India

Un artigo publicado recentemente revela que as poboacións da India que falan unha lingua diferente do inglés son as que máis contribúen ao crecemento da enciclopedia en liña.

Fonte: Clubic Pro

Cada vez máis estranxeiros mostran interese polo estudo da lingua portuguesa

De agosto do ano pasado ata agora, aumentou case un 30 % o número de estranxeiros que se interesaron polos cursos de portugués para estranxeiros na Facultade de Letras da Universidade de Lisboa. O coordinador dos cursos subliña o aumento do interese dos orientais pola lingua portuguesa.

Fonte: Tsf

Un total de 46 das 54 linguas nativas de Bolivia están ameazadas ou extintas

Unha investigación presentada no marco do Congreso de Estudos Bolivianos revelou que das 54 linguas nativas de Bolivia, 15 xa están extintas (28 %), 11 se encontran moribundas (20 %), 20 están seriamente ameazadas (37 %) e só o 14 % delas se fala actualmente.

Fonte: Correo del Sur

Un cidadán francés loita por preservar unha lingua morta de Alasca

En 2008, morreu Marie Smith Jones, última falante de eyak. A tribo amerindia de Alasca do mesmo nome pensaba que con ela se perdería a lingua dos seus devanceiros. Porén, o eyak non dixo a súa última palabra, dúas persoas aínda o falan: Michael Krauss, un estadounidense apaixonado pola súa cultura, e Guilliame Leduey, un mozo francés de 23 anos que decidiu dedicarse á revitalización da lingua.

Fonte: French Morning

O comisario de Linguas Oficiais de Canadá pediralle ao ministro de Exteriores que corrixa as súas tarxetas de visita monolingües

O comisario de Linguas Oficiais de Canadá, Graham Fraser, pediralle a John Baird, ministro de Exteriores, que rectifique as súas tarxetas de visita escritas unicamente en inglés. Graham Fraser recibiu xa catro queixas sobre as tarxetas que non cumpren a política de bilingüismo nas comunicacións do Goberno canadense.

Fonte: Le Droit

Un estudo revela que a India perdeu 220 linguas en 50 anos

Un estudo de dous anos, realizado polo Centro de Publicacións e Investigacións Bhasha, revelou que a India perdeu arredor dun 20 por cento das súas linguas nativas nos últimos 50 anos.

Fonte: Oneindia

Boletín

Subscríbase ao boletín

Logo Feder