Lexicógrafos da Comunidade dos Países de Lingua Portuguesa (CPLP) encóntranse reunidos en Cabo Verde para definir a metodoloxía destinada a consolidar e unificar os dous vocabularios da lingua portuguesa existentes publicados en Portugal e Brasil.

Fonte: SIC Notícias

Ante o acelerado proceso de desaparición das linguas iumanas, cucapá, kiliwa, paipai e kumiai, os únicos catro idiomas indíxenas vivos do estado mexicano de Baixa California, diversas institucións académicas asinarán un convenio de colaboración para o seu rescate.

Fonte: El Universal

O pasado ano académico, 23 alumnos de Islandia estudaron chinés nas escolas elementais, algo que non se producira ata agora na educación regrada deste país nórdico. O inglés é a primeira lingua estranxeira da educación obrigatoria, seguido do dinamarqués. Porén, en moitas escolas, os alumnos que coñezan linguas como o noruegués ou o sueco, poden cursar estas linguas no canto do dinamarqués.

Fonte: Iceland Review

O Foro de Empresas Privadas do Reino Unido advirte que as baixas competencias lingüísticas en linguas estranxeiras supoñen un gasto de 21.000 millóns de libras esterlinas para as empresas, o que as deixa nunha situación de desvantaxe por detrás das corporacións que invisten cada vez máis en persoal multilingüe.

Fonte: Fresh business thinking

Os residentes do condado escocés de North Lanarkshire deberán dar a súa opinión acerca do plan da corporación local destinado á promoción da lingua gaélica.

Fonte: Motherwell Times

A Universidade de Kansas está participando nun proxecto de preservación de linguas ameazadas do occidente de China grazas á axuda de dúas bolsas do programa de documentación de linguas ameazadas. Dous investigadores da Universidade de Kansas e da Universidade de Qinghai Nationalities traballarán en métodos destinados á recuperación de linguas ameazadas e formarán outros lingüistas para que continúen o seu traballo. Ademais, crearon un sitio web que documentará o idioma de Salar, unha lingua ameazada dunha rexión do occidente de China, ademais doutras catro linguas que se falan nunha rexión que foi poboada por mongois, turcos, tibetanos e chineses no século XIII.

Fonte: Kansan

En Perú, arredor de 700.000 persoas sofren algún tipo de discapacidade auditiva. Porén, calcúlase que existen só 30 intérpretes en lingua de signos para a totalidade desta poboación, é dicir, só hai un intérprete para máis de 23.000 persoas con xordeira.

Fonte: La República

As novas regras da lingua portuguesa xa están dispoñibles gratuitamente en internet. Esta nova edición en liña, dispoñible en http://www.flip.pt/acordo, ten como obxectivo explicar nunha linguaxe simple como se aplica o novo Acordo Ortográfico da lingua portuguesa.

Fonte: Jornal de Notícias

Os falantes de córnico poden ler agora a Biblia na súa lingua, despois de que o profesor Nicholas Williams traducira o Antigo Testamento ao córnico. Para esta obra, o tradutor empregou varias versións, entre as que se inclúen textos escritos en hebreo e grego.

Fonte: BBC News

O Ministerio de Educación turco elaborou un novo programa para este ano académico que introducirá o árabe como materia optativa para os alumnos de educación primaria.

Fonte: World Bulletin