Aínda que as estatísticas mostran que as linguas nativas americanas están ameazadas e o censo dos Estados Unidos revela que queda menos de medio millón de falantes destas linguas en todo o país, houbo algúns avances na súa revitalización e preservación ao longo do ano 2011.

Fonte: Indian Country

O presidente xeorxiano, Mikheil Saakashvili, reuniuse con 150 participantes do programa estatal "A lingua xeorxiana para o éxito futuro" que anima as minorías étnicas de todo o país a fortaleceren o sentimento de identidade xeorxiana.

Fonte: The Messenger Online

A pesar dos progresos significativos no apoio ao éuscaro nos últimos anos no País Vasco francés, a asociación Euskal Konfederazioa cre que o proceso de promoción lingüística ten que pasar necesariamente pola oficialización da lingua vasca.

Fonte: Le Journal du Pays Basque

Unha investigación revela que moitos municipios de Suecia incumpren a obriga de ofrecer prazas de lingua sueca, nos prazos estipulados por lei, a inmigrantes que acaban de chegar ao país.

Fonte: The Local

O estudo da lingua rusa experimentou un desenvolvemento na India e espérase que continúe esta tendencia grazas á promoción e ao apoio por parte de institucións afiliadas co Goberno ruso. Como proba disto, o número de estudantes e clases de ruso ten rexistrado un incremento no país asiático.

Fonte: Russia and India Report

O colexio de avogados da cidade de Quimper, en Francia, asinou o acordo "Ya d’ar brezhoneg", aprobado pola Oficina da Lingua Bretoa, para estimular o uso desta lingua na vida cotiá na Bretaña.

Fonte: Novo Press

Varias organizacións sociais demandaron ao Ministerio de Educación boliviano o ensino de chinés mandarín como lingua estranxeira nas escolas públicas do país.

Fonte: FM Bolivia

Alasdair Allan, o ministro de Ensino, Ciencia e Linguas escocesas, anunciou a celebración dun encontro cos xefes de educación doutras partes do mundo co fin de inverter o declive do ensino das linguas estranxeiras nas escolas escocesas, despois de que as estatísticas mostraran unha caída do 80 % no número de auxiliares de lingua estranxeira en Escocia.

Fonte: Stv

O candidato republicano á presidencia dos Estados Unidos, Rick Perry, defendeu que lle gustaría que o inglés se convertese na lingua nacional do país, despois de concordar coa opinión dun votante que protestou pola presenza de varias linguas estranxeiras na vida cotiá dos Estados Unidos.

Fonte: Associated Press

Os documentos do Estado portugués, así como os servizos e entidades gobernamentais como o Diario da República, aplicarán a partir de agora o Novo Acordo Ortográfico da lingua portuguesa.

Fonte: European Pressphoto Agency