Unha petición en liña reclama que o paxtún, unha das linguas oficiais de Afganistán, se engada aos máis de 70 idiomas de tradución de Google Translate. A iniciativa recibiu máis de 3000 sinaturas.

Fonte: Rfi

Unha axuda pública do Goberno galés e da canle de televisión S4C financiará o desenvolvemento dunha tecnoloxía de recoñecemento de voz en lingua galesa. O ministro principal de Gales, Carwyn Jones, declarou que esta tecnoloxía é necesaria para garantir o florecemento da lingua galesa no século XXI.

Fonte: BBC

A Oficina de Estado de Prensa, Radio e Televisión de China declarou que todos os presentadores de televisión deben falar en chinés mandarín e evitar os dialectos e todas as linguas estranxeiras co fin de promover a lingua estándar.

Fonte: Shanghaiist

O Ministerio de Educación do Xapón iniciou a reforma do ensino da lingua inglesa no sistema educativo co obxectivo de formar unha xeración de traballadores que poidan desenvolver un papel activo a nivel mundial. A nova reforma prevé que a aprendizaxe do inglés comece antes e permite impartir neste idioma algunhas clases do ensino medio.

Fonte: The Japan News

Bota a andar a tradución ao tibetano da Enciclopedia de China que, segundo Cedain Zhaxi, xefe do instituto de estudos tibetanos da Universidade do Tibet, tardará cinco anos en ser rematada. Esta universidade e a Rexión Autónoma do Tibet serán os responsables da tradución e posterior publicación da obra.

Fonte: English East Day

O carácter árabe continuará sendo un dos principais piares de Tunisia. O novo texto constitucional do país africano non inclúe, polo menos na súa primeira parte, a lingua e cultura do pobo tamazight. A Asemblea Constitucional de Tunisia aprobou os primeiros artigos da nova Constitución, tres anos despois da caída do presidente autoritario Zine El Abidine Ben Ali.

Fonte: Nationalia

O Parlamento de Iraq aprobou a lei da oficialidade do kurdo que concede a esta lingua o rango de oficial en todas as provincias iraquís.

Fonte: Zawya

Egerin, o primeiro motor de busca en internet en lingua kurda, ofrece aos falantes desta lingua unha alternativa ás ferramentas tradicionais que non inclúen este idioma. Grazas a Egerin, agora os kurdos poden facer buscas e escribir blogs na súa lingua e non precisan saber inglés para navegar pola rede.

Fonte: SBWire

Dado que a lingua que ten o maior risco de desaparecer no estado mexicano de Chihuahua é a pima, o subsecretario de Educación, Horacio Echavarría, dixo que a estratexia e o plan integral de educación indíxena no estado prevé a creación dunha zona lingüística delimitada (ou niño de linguaxe), para que os poucos falantes transmitan o seu idioma aos máis pequenos e así poder rescatar unha importante bagaxe cultural.

Fonte: El Diario

Un novo estudo de investigadores da Universidade de Houston, en Texas (EUA), pode axudar no ensino e aprendizaxe de idiomas. O Dr. Arturo Hernández, director do Laboratorio de Bases Neurais do Bilingüismo na universidade, utilizou técnicas de comportamento e métodos de neuroimaxe para investigar a aprendizaxe dunha nova lingua nun cerebro bilingüe. Os resultados mostraron que unha abordaxe “orgánica” centrada nos fonemas en vez de en regras gramaticais, como a que emprega unha nena ou neno cando aprende a se comunicar, pode acelerar en máis dun 20 % o estudo da lingua.

Fonte: Terra