Unha lexisladora de Aurora, no estado americano de Colorado, Suzanne Williams, está tentando que se aprobe unha lei que aspira a promover as linguas indias americanas nas escolas públicas. A proposta, que se atopa aínda nas fases iniciais do proceso de aceptación lexislativa, permitiría aos falantes adultos das tribos indíxenas traballar nas escolas públicas como profesores das súas linguas nativas.

Fonte: Aurora Sentinel

O Instituto de Lingua Alemá de Atenas viu como o número de inscricións en cursos de lingua alemá medrou un 23 % en comparación co mesmo período do ano pasado: uns 450 estudantes fronte aos 370 do mesmo semestre de 2011.

Fonte: EUobserver

Nunha carta a un xornal italiano, o antigo ministro de Economía e Finanzas, Giulio Tremonti, pediu á cadea pública de televisión (RAI) que retransmita películas en versión orixinal con subtítulos en italiano, co fin de incrementar a competencia lingüística dos cidadáns.

Fonte: POST

Un novo informe mostra que, dentro de dez anos, o ensino da lingua indonesia desaparecerá completamente do sistema educativo de Australia. Desde 2006, as inscricións caeron un 40 % e as universidades están pechando os programas de ensino desta lingua.

Fonte: ABC Radio Australia

Representantes dos oito pobos indíxenas de Chile pediron o recoñecemento oficial do quechua, aimará, mapudungun (ou mapuche), rapa nui, kawescar, yagan e selknam (a lingua da oitava comunidade, o kunza, xa está extinguida) a través dunha nova lei de dereitos lingüísticos. Os representantes indíxenas, organizados na Rede EIB, afirmaron que todas estas linguas están ameazadas (mapuche, quechua, aimará e rapa nui) e algunhas teñen unha situación crítica (kawescar, yagan e selknam), e demandaron ao presidente chileno, Sebastián Piñera, que inicie un proceso que garanta a súa "recuperación e preservación".

Fonte: Nationalia

O editor, tradutor, lexicólogo e profesor universitario, João Baptista de Medeiros Vargens, recibiu o premio Sharjah da UNESCO polo seu estudo sobre a influencia do idioma árabe na lingua portuguesa.

Fonte: Veja

A Academia da Lingua Hebrea desaproba o crecente uso do inglés como lingua de instrución nas institucións de educación superior de Israel e esixiu ao ministro israelí de Educación que restableza o hebreo como lingua académica.

Fonte: Haaretz

O coordinador lingüístico do Instituto Nacional de Antropoloxía e Historia (INAH) de México, Fidencio Briseño Chel, explicou que a pesar de que o maia é unha das linguas indíxenas máis faladas, o número dos seus falantes está decrecendo e podería desaparecer no prazo de dúas xeracións.

Fonte: The Yucatan Times

A tres anos da aplicación do Acordo Ortográfico na Comunidade de Países de Lingua Portuguesa, o secretario portugués de Estado da Cultura, Francisco José Viegas, defendeu a necesidade de afinar algunhas das normas da nova ortografía.

Fonte: RTP

A promoción do uso da lingua galesa na vida diaria constitúe unha prioridade para o Goberno galés. Unha nova estratexia reclama máis oportunidades para que a xente poida falar galés socialmente e no ámbito do traballo.

Fonte: BBC