A aprendizaxe da lingua persa está medrando en Paquistán o que podería mellorar as relacións bilaterais entre este país e o veciño Irán, declarou o embaixador iraniano, Hali Raza Haqiqian, na sesión de clausura dun obradoiro organizado polo Instituto de Estudos Persas.

Fonte: Pakistan Observer

Despois de que Guinea Ecuatorial declarase o portugués como lingua oficial coa intención de estreitar lazos con outros países lusófonos e integrarse na Comunidade de Países de Lingua Portuguesa (CPLP), o país africano asinou agora un Convenio de Cooperación Técnica co Instituto Internacional da Lingua Portuguesa. Por medio deste acordo un grupo de lingüistas lusófonos viaxará a Guinea Ecuatorial para estudar a lingua crioula de base portuguesa da provincia de Annobón que era unha illa inhabitada antes de que os portugueses a colonizaran no século XV.

Fonte: Language Magazine

Unha iniciativa radiofónica está rescatando da escuridade e da ameaza de extinción as linguas minoritarias de Camboxa. O proxecto conta co apoio da Organización das Nacións Unidas para a Educación, a Ciencia e a Cultura (UNESCO) para salvagardar o patrimonio cultural do país asiático.

Fonte: The Phnom Penh Post

Rusia esixirá que a UE conceda ao idioma ruso un estatuto oficial, anunciou o viceprimeiro ministro, Dmitri Rogozin. En particular, defendeu que a lingua rusa debe ser recoñecida como oficial ou rexional en todos os lugares onde estean presentes numerosas comunidades de fala rusa.

Fonte: Voz da Rússia

Unha nena nativa americana recibiu un castigo por falar en menominee (a lingua do pobo do mesmo nome) nunha escola da cidade de Shawano no estado de Wisconsin nos EUA.

Fonte: The Star

A valorización e o ensino da lingua sarda e doutras linguas minoritarias de Sardeña son o obxectivo principal dunha serie de iniciativas organizadas pola Universidade italiana de Sassari.

Fonte: Alguer

Grupos de apoio á lingua irlandesa na República de Irlanda estanse manifestando contra os efectos que os recortes económicos teñen na lingua. En concreto, están preocupados polo impacto negativo que estes exercen na situación actual da lingua e que poderían pór en perigo as políticas de promoción e normalización actuais.

Fonte: Irish Times

As redes sociais Google+ e Twitter anunciaron que engadirían novas linguas aos seus dominios. Twitter notificou a inclusión de catro novas linguas (árabe, persa, hebreo e urdu), mentres que a rede social de Google, Google+, está agora dispoñible en 60 linguas fronte ás 44 que incluía previamente.

Fonte: TechCircle

O Goberno do Reino Unido está baixo presión para conceder á lingua gaélica o mesmo status nacional do que gozan o inglés e o galés. Un deputado laborista do Parlamento británico iniciou unha campaña para pór fin á "discriminación" que o gaélico padece por parte de Westminster.

Fonte: The Press and Journal

Gladys Thompson, a última falante dunha das linguas nativas (o kiksht) do estado de Oregón, nos EUA, morreu aos 97 anos de idade. Naceu na reserva india de Warm Springs en 1915 e aprendeu o kiksht dos seus pais. O Goberno de Oregón condecorouna no ano 2007 pola súa contribución á preservación da cultura nativa.

Fonte: OPB News