Só un de cada 40 diplomáticos do Reino Unido pode falar con fluidez a lingua do país no que traballa e a maioría mesmo carece de coñecementos básicos para os intercambios comunicativos do día a día. Algunhas embaixadas británicas, como a de Acerbaixán, Bielorrusia, Cuba, Exipto, Malaisia e Filipinas non contan con diplomáticos que falen a lingua local.

Fonte: The Telegraph

O presidente da República de Chechenia, Ramzan Kadyrov, asinou un decreto polo que se aproba a celebración do festival da lingua chechena. Con motivo deste acontecemento, a república organizará concursos de relatos e poemas, así como conferencias e competicións que terán como principal protagonista a lingua chechena.

Fonte: Vestnik Kavkaza

Máis de 700 institucións de ensino de idiomas estranxeiros establecéronse na capital chinesa (Pequín) para animar a poboación a aprender outro idioma, anunciou o comité organizador do programa "Pequín fala linguas estranxeiras”.

Fonte: Spanish China.org

O sociólogo Lencaster José Garcia defendeu que a introdución das linguas vernáculas angolanas no ensino vai garantir a preservación da cultura nacional e facilitar o desenvolvemento da ciencia e a tecnoloxía.

Fonte: ANGOP

Líderes empresariais de Gales defenden que os plans para eliminar o ensino en inglés nun importante bastión da lingua galesa poderían incidir negativamente na economía, xa que sería un obstáculo para que potenciais negocios se establecesen na zona.

Fonte: Wales Online

Un importante grupo empresarial británico declarou que a aprendizaxe dunha lingua estranxeira debe ser obrigatoria ata os 16 anos co fin de que o Reino Unido poida desenvolver negocios e crear oportunidades no estranxeiro.

Fonte: The Telegraph

O ministro brasileiro de Educación, Aloizio Mercadante, recomendou aos estudantes que pretenden obter bolsas de estudo fóra do país no programa "Ciencias sen fronteiras", que estuden linguas estranxeiras para facilitar o proceso de ingreso nas institucións internacionais.

Fonte: Último segundo

Na aldea illada de Kumzar, na entrada do estreito estratéxico de Ormuz (Omán), unha rexión pola cal circula o 35 % do petróleo mundial, os habitantes falan un idioma indoeuropeo único, o kumzari, que está ameazado de extinción.

Fonte: Veja

Algúns dos municipios máis pobres do Reino Unido gastaron millóns de libras esterlinas en clases extraescolares de linguas como o bengalí, urdú ou árabe en mesquitas e centros sociais para que os nenos de familias inmigrantes aprendan as linguas maternas dos seus pais.

Fonte: Express

Estímase que só 3000 persoas no mundo falan con fluidez a lingua mohawk. Un programa educativo organizado pola Universidade McGill, en Canadá, forma titulados que están a aumentar o número de falantes desta lingua nativa canadense.

Fonte: Montreal Gazette