Os expertos queren regular e protexer o kurdo para garantir que a lingua non morrerá no futuro. O proxecto de lei inclúe o uso e respecto da lingua kurda en varias áreas da rexión semi-autónoma de Iraq.

Fonte: Press TV

A Fundación do Pensamento Árabe anunciou o comezo da súa iniciativa “Subamos coa nosa lingua”, que pretende aumentar e promover o uso da lingua árabe.

Fonte: Gulf News

Un defensor das linguas do Pacífico en Nova Celandia solicita a axuda dos maorís para manter as linguas vivas entre as comunidades das illas pacíficas de Nova Celandia.

Fonte: Radio New Zealand International

As comisións Nacional de Dereitos Humanos (CNDH) e do estado de Iucatán (Codhey) lanzaron unha campaña contra a trata de persoas, que será traducida a un total de dez linguas indíxenas.

Fonte: Proceso

O presidente da agrupación de Escolas de Miranda de Douro asegurou que nunca houbo tantos alumnos matriculados na disciplina de lingua e cultura mirandesas como este ano.

Fonte: Jornal de Notícias

Segundo un informe, Irlanda do Norte amosa unha imaxe débil con respecto á aprendizaxe de linguas estranxeiras e necesita darlle a esta cuestión máis importancia. O estudo, elaborado polo British Council, avisa de que Irlanda do Norte “dista de ser autosuficiente na produción de lingüistas naquelas linguas que poidan ser necesarias” no mundo dos negocios.

Fonte: BBC

O número de mozos que estudan linguas europeas en bacharelato no Reino Unido está en declive, como amosa o feito de que as solicitudes para estudar francés descenderon un terzo desde o ano 2000, mentres que os alumnos de alemán se reduciron á metade en só unha década. Porén, os estudantes seguen a ter interese polas linguas, algo ao que as universidades se están habituando.

Fonte: The Guardian

Youtube engadiu seis linguas para a súa sección de subtítulos. Anteriormente, estes só se podían activar en inglés, español, xaponés e coreano. Porén, os novos idiomas engadidos son o alemán, o italiano, o francés, o portugués, o ruso e o holandés.

Fonte: ABC

No marco do proceso electoral que vivirá o estado mexicano de Veracruz, é necesario que as comunidades indíxenas conten coa información necesaria para poder reflexionar e tomar unha mellor decisión, polo que a Academia Veracruzana das Linguas Indíxenas propuxo a tradución do Código electoral ás diversas linguas indíxenas.

Fonte: Veracruzanos

O idioma portugués recupera pouco a pouco o seu esplendor en Timor Leste grazas a un plan de introdución na educación primaria e secundaria e que, a partir de 2013, acadará tamén a formación universitaria nesta ex-colonia lusa en Asia.

Fonte: EFE