Segundo o ministro de Educación de Angola, Pinda Simão, o ensino das linguas nacionais nos primeiros anos de escolaridade está condicionado polo reducido número de profesores.

Fonte: Agência Angola Press

O filme en lingua irlandesa An Bronntanas representará a Irlanda na 87 edición dos Premios da Academia, no apartado de mellor filme en lingua non inglesa. A directora executiva da Academia do Cinema e da Televisión de Irlanda (IFTA, polas súas siglas en inglés), Áine Moriarty, declarou que esta decisión será unha grande oportunidade para achegar a lingua nativa de Irlanda a un público internacional máis amplo.

Fonte: The Irish Times

Mundus21, unha canle de televisión en internet, reunirá vídeos de produción cultural en lingua portuguesa e pretende converterse na maior base de datos mundial nesta área, informou á axencia Lusa a directora xeral do proxecto.

Fonte: Diário digital

A Asociación de Turcos de Serbia lanzou unha iniciativa que defende a introdución da lingua turca nas escolas serbias como materia opcional. Expertos turcos acolleron a proposta con satisfacción e declararon que podería ser beneficiosa para garantir os dereitos dos cidadáns turcos no país balcánico e para favorecer as relacións diplomáticas entre os dous países.

Fonte: SETimes

Desde Bogotá estase promovendo a creación dun medio de información para os indíxenas do país. Trátase do diario Konuco & Chagras que pretende chegar ás zonas selváticas do país con noticias en español e linguas nativas.

Fonte: El Espectador

O municipio brasileiro de Recife reforzará o ensino da lingua inglesa. A Secretaría Municipal de Educación e o British Council asinaron un convenio para desenvolver sesións de capacitación de profesores deste idioma.

Fonte: NE10

Nun debate sobre a importancia do investimento na aprendizaxe de linguas, o xefe de Política Educativa da Confederación de Empresarios de Irlanda (IBEC, polas súas siglas en inglés) declarou que Irlanda non pode satisfacer o seu potencial no mercado mundial por mor do limitado desenvolvemento das habilidades lingüísticas dos traballadores.

Fonte: Irish Examiner

A ministra de Ciencia e Tecnoloxía de Angola, Maria Cândida Teixeira, considerou en Luanda que a lingua inglesa é unha ferramenta indispensable no proceso de formación da xente nova, por ser un idioma que contribúe ao desenvolvemento profesional, persoal e cultural.

Fonte: ANGOP

A académica Inocência Mata, especialista en Estudos Poscoloniais, defendeu en Macau que a lingua portuguesa en África vive entre o paradoxo de ser "construtora" e ao mesmo tempo un "motor de exclusión".

Fonte: Sapo

Milleiros de indíxenas do estado de Alasca (EUA) poderán votar por primeira vez nas súas linguas nativas despois de que un xuíz federal decretase que o estado violou a Lei de dereitos electorais ao non producir material electoral en iupik e kutchin, dúas linguas indíxenas.

Fonte: Think Progress