Un programa de revitalización de linguas nativas dunha universidade da cidade tanzana de Dar es Salaam recibe un importante recoñecemento pola súa excelencia no ámbito da educación indíxena.

Fonte: Digital Journal

A falta de tradutores de lingua irlandesa en Bruxelas é a razón principal de que o sitio web do Parlamento Europeo non estea traducido a esta lingua. Un grupo de falantes presentou unha queixa denunciando esta situación ao Valedor do Pobo da Unión Europea.

Fonte: Independent

As aventuras de Tintín foron lidas en máis de 70 linguas desde 1930, mais nunca antes foran traducidas ao escocés (ou Scots) e ao gaélico escocés. Os editores prevén que estas novas edicións suscitarán o interese de centros escolares e coleccionistas.

Fonte: The Scotsman

A través deste documento pídeselles á Unión Europea e aos Estados membros que presten maior atención á situación das linguas en perigo de desaparición e se comprometan coa preservación da diversidade lingüística implementando políticas de revitalización dos idiomas ameazados.

Fonte: Consello da Cultura Galega

Un bo número de municipios de toda Occitania serán testemuñas do nacemento, a partir do próximo ano, dun novo movemento político occitanista con motivo das eleccións municipais. Entre as claves desta nova plataforma estará a promoción da lingua occitana.

Fonte: Nationalia

O Goberno dos Azores organizará dous cursos de lingua portuguesa destinados a cidadáns inmigrantes, nunha primeira fase só nas illas de São Miguel e Terceira, revelou a Oficina de Apoio á Comunicación Social (GACS) da rexión.

Fonte: Dnotícias

Unha plataforma en liña de autoaprendizaxe de linguas porase proximamente á disposición dos demandantes de emprego de Bruxelas, anunciaron Céline Frémault e Rachid Madrane, ministros de Emprego e de Formación profesional, respectivamente, da rexión de Bruxelas.

Fonte: Rtbf

A difusión da lingua portuguesa pasou dun obxectivo centrado na Comunidade dos Países de Lingua Portuguesa (CPLP) para se proxectar alén das fronteiras. O Instituto Camões, a CPLP e un conxunto de universidades portuguesas xúntanse nunha conferencia en Lisboa para apoiar a "difusión do portugués como lingua internacional”. “A lingua portuguesa xa non é só a lingua dos pobos da CPLP", declarou Ana Paula Laborinho, presidenta do Instituto Camões.

Fonte: Público

A introdución dun proxecto bilingüe de aprendizaxe en lingua portuguesa e crioulo caboverdiano constitúe unha das novidades do ano lectivo 2013-2014. O Ministerio de Educación do arquipélago caboverdiano revelou que se trata dun proxecto innovador que pretende introducir a lingua materna caboverdiana no sistema educativo sen esquecer o perfeccionamento do ensino da lingua portuguesa.

Fonte: Portugal Digital

Os contratos de traballo poderán redactarse nunha lingua diferente ao neerlandés. O Goberno flamengo modificará o decreto sobre o emprego das linguas co fin de axustarse a unha sentenza sobre este asunto ditada polo Tribunal de Xustiza da Unión Europea.

Fonte: 7sur7