Mellorar a calidade das revistas científicas editadas nos países da Comunidade de Países de Lingua Portuguesa (CPLP), identificar áreas de actividade en que a lingua portuguesa poida contribuír ao desenvolvemento económico e reforzar o investimento en formación de profesores de portugués son algunhas das propostas presentadas por especialistas lusófonos para promover e difundir o portugués en todo o mundo.

Fonte: TV Ciência

O Goberno da República de Irlanda vén de suprimir o sistema que permitía obter méritos ás persoas que demostrasen un dominio da lingua irlandesa nos exames da función pública.

Fonte: The Irish Times

Seis linguas nativas do país africano de Benin foron introducidas no sistema educativo no curso 2013-2014, informou o inspector xeral pedagóxico do Ministerio beninés de Educación preescolar e primaria, Bernardin Aholoukpè.

Fonte: Afriquinfos

O Brasil subiu oito postos no índice de dominio da lingua inglesa (EPI, polas súas siglas en inglés), divulgado pola empresa de intercambio sueca Education First (EP). Agora, o país suramericano ocupa o lugar 38 e figura no grupo dos países con "baixo dominio" do idioma estranxeiro.

Fonte: Veja

Defensores da lingua galesa rexeitan o borrador dos orzamentos galeses que significarán uns recortes de máis de 1,5 millóns de libras en materia lingüística. Así mesmo, negan que se manteña o investimento na promoción e protección da lingua galesa, tal e como afirmou o ministro principal de Gales, Carwyn Jones.

Fonte: Wales Online

O Concello croata de Vukovar modifica o seu estatuto e oficializa só o croata e o alfabeto latino, en detrimento do serbio e o alfabeto cirílico. O Consello Nacional Serbio denunciará a decisión perante o Tribunal Constitucional.

Fonte: Nationalia

Nos últimos "cinco ou seis anos a explosión (do ensino) do portugués en China foi fantástica" declarou o profesor Carlos Ascenso André, un dos oradores do relatorio "Ensino da Lingua Portuguesa en China", un dos temas a debate da pasada conferencia internacional "Lingua Portuguesa no Sistema Mundial".

Fonte: Expresso

Unha organización sen ánimo de lucro está a buscar financiamento para abrir a primeira escola de educación preescolar en lingua córnica no Reino Unido a partir do próximo ano.

Fonte: Nursery World

Un minucioso estudo revela que falar unha segunda lingua podería adiar a aparición de certas formas de demencia en persoas anciás.

Fonte: La Presse

O descenso do número de cidadáns anglófonos que falan dúas linguas en Canadá preocupa ao comisario de linguas oficiais, Graham Fraser. Esta situación podería constituír un obstáculo para acadar certas melloras como, por exemplo, esixirlles aos xuíces do Tribunal Supremo Canadense que sexan bilingües.

Fonte: La Presse