Arredor de 3500 persoas, segundo os organizadores, manifestáronse na localidade vascofrancesa de Maule (Mauléon, en francés) para reclamar a cooficialidade do éuscaro e a autonomía do País Vasco francés.

Fonte: Nationalia

Cada vez existen máis alumnos nas escolas de idiomas portuguesas que se interesan polos cursos de curta duración. Os principais motivos son a inestabilidade laboral e a necesidade crecente de buscar un emprego no estranxeiro.

Fonte: Dinheiro Novo

Os activistas da Alianza Rusa en Europa, que reúne os falantes de lingua rusa na Unión Europea, están convencidos de que o ruso ten o dereito lexítimo de ser usado na Unión Europea a nivel oficial. Esta asociación fará unha recolla de sinaturas en apoio á lingua rusa en Europa.

Fonte: Voz da Rússia

O ministro kuwaití de Comercio e Industria, Anas Al-Saleh, instou a todos os estados membros da Organización Mundial do Comercio a que recoñezan o árabe como lingua oficial da institución.

Fonte: Kuna

O coñecemento da lingua maorí continúa retrocedendo en Nova Zelandia malia o incremento do número de neozelandeses que pertencen ao grupo étnico maorí. A porcentaxe de maorís que falan a lingua precolonial diminúe e isto pode ameazar a posición do idioma coma segundo máis falado do país insular.

Fonte: Nationalia

Un grupo de traballo do Goberno de Gales recomenda que as cidades de Bangor, Aberystwyth e Carmarthen se desenvolvan como "rexións urbanas" co fin de potenciar a rexeneración económica e a mellora das infraestruturas potenciando o uso da lingua galesa. O obxectivo é incrementar o número de falantes que adopten o galés como primeira lingua.

Fonte: Wales Online

O comisario da lingua irlandesa, Seán Ó Cuirreáin, anunciou a súa dimisión pola falta de compromiso real do Estado irlandés na protección dos dereitos dos falantes de gaélico.

Fonte: Independent

Segundo fontes oficiais, Benin elaborou unha estratexia global para a introdución das linguas nacionais no sistema educativo formal.

Fonte: iciLome

O primeiro ministro do Reino Unido, David Cameron, declarou á volta dunha visita oficial a China que o alumnado británico debería deixar de estudar francés e alemán e aprender chinés. Ademais, afirmou que espera dobrar o número de auxiliares de conversa chineses nas escolas británicas antes de 2016 e incrementar os fondos para que os centros educativos poidan ofrecer o ensino do chinés mandarín.

Fonte: Daily Mail

O Grupo de investigación de Estudos Galegos da UW-Milwaukee acaba de convocar o primeiro simposio sobre o "Mapa dos estudos galegos en Norteamérica" que terá lugar nesta universidade dos EE.UU. en maio de 2014.

Fonte: Galicia Confidencial