O lingüista brasileiro Ernani Pimentel presentou en Portugal un proxecto para simplificar o idioma portugués. O lingüista, que é presidente do Centro de Estudos Lingüísticos da Academia de Letras de Brasilia, liderou o movemento "Acordar mellor", que resultou nun libro que ofrece un enfoque crítico sobre o Novo Acordo Ortográfico.

Fonte: Expresso

A lingua de signos portuguesa recibiu o recoñecemento da República Portuguesa hai 16 anos, mais a Asociación de Xordos do Porto lamenta que non sexa unha ferramenta o suficientemente desenvolvida e defende a súa “maior visibilidade” nunha sociedade que aínda “mantén o prexuízo”.

Fonte: Jornali

Os medios de comunicación da India móstranse críticos coas proposta de prohibir o uso da lingua inglesa no Parlamento. O líder do Partido Samajwadi (SP), Mulayam Singh Yadav, declarou que no seu lugar debería promoverse o uso do hindi e doutras linguas rexionais indias.

Fonte: BBC

Unha serie de factores económicos, políticos e culturais determinan os dez idiomas que desempeñarán un papel crucial na prosperidade do Reino Unido. As cinco linguas máis populares para os británicos son o español, o árabe, o francés, o chinés e o alemán. O portugués, o italiano, o ruso, o turco e o xaponés ocupan os lugares restantes.

Fonte: Voz da Rússia

Un estudo sobre habilidades laborais revela que os falantes de galés adoitan estar máis cualificados que os que só falan inglés. Así mesmo, o estudo demostra que existen importantes diferenzas de aprendizaxe e rendemento entre estes dous grupos de falantes.

Fonte: Daily Post

O presentador da canle BBC, Huw Edwards, está protagonizando unha campaña para salvar a igrexa de lingua galesa máis antiga de Londres e que considera como "unha casa lonxe da terra". A capela orixinal data de 1774 e foi o primeiro centro de culto en lingua galesa da capital británica.

Fonte: London Evening Standard

Google anunciou unha actualización da súa aplicación de tradución para Android que permite traducir conversas en tempo real, un servizo máis rápido, soporte a novas linguas e unha nova interface de usuario.

Fonte: Diário Digital

Un equipo técnico boliviano desenvolveu un corrector ortográfico para as linguas aimará, quechua e guaraní, como parte dunha cruzada para "revitalizalas". Trátase dun programa para computador que permitirá corrixir erros mentres o usuario escribe nalgunha desas linguas nativas. O software é libre e poderá descargarse de internet, a través de sete portais web.

Fonte: Página Siete

Os catalanistas de Francia pretenden facerlle chegar á Conferencia Xeral da UNESCO a denuncia do perigo de extinción do catalán e outras linguas minoritarias por culpa da negación da diversidade lingüística por parte do Estado francés.

Fonte: Diálogo Libre

A escola Oasis Academy de Croydon, no sur de Londres, rexistra a porcentaxe de uso de linguas estranxeiras máis alta de todo o Reino Unido, cun total de 69 idiomas contabilizados. As linguas maternas do alumnado varían desde o francés e o turco, ata linguas crioulas como o papiamento e idiomas tribais africanos como o oshivambo e o wolof.

Fonte: Express