Máis de 700 estudantes portugueses da Universidade de Aveiro aprenderon nos últimos anos a escribir e a falar chinés despois de que esta lingua se integrase na Licenciatura de Linguas e Relacións Empresariais e nos mestrados en Estudos Chineses e en Linguas e Relacións Empresariais.

Fonte: Rostos

Na actualidade, os sinais das estradas da República de Irlanda dan preferencia ao inglés en detrimento do irlandés. Porén, o ministro de Transportes, Leo Varadkar, aprobou un plan que substituirá gradualmente os sinais por outros nos que se dea igual de importancia ao inglés e ao gaélico irlandés.

Fonte: Independent

Os deputados do partido Europa Ecoloxía propoñen cambiar a Constitución francesa para poder introducir a Carta Europea das Linguas Rexionais ou Minoritarias no ordenamento xurídico francés. Durante a pasada carreira electoral, o actual presidente, François Hollande, comprometeuse a ratificala mais o Consello de Estado emitiu un ditame negativo.

Fonte: Nationalia

Os creadores de aplicacións para Android que queiran ampliar os seus mercados internacionais poden gozar desde agora do servizo de traducións de aplicacións presentado no último congreso Google I/O, e que leva meses funcionando en probas para comprobar o bo funcionamento desta nova solución para a localización de aplicacións a distintos mercados.

Fonte: Código Cero

O Senado de México aprobou unha reforma para garantir que as persoas que falen linguas indíxenas teñan dereito a un intérprete cando se enfronten a un xuízo.

Fonte: El Porvenir

O comisario de linguas oficiais de Canadá, Graham Fraser, considera que a cidade de Ottawa debe converterse nunha capital bilingüe e lamenta que a comunidade anglófona do país e o propio alcalde da cidade non opinen o mesmo.

Fonte: La Presse

A Comisión de Asuntos Indíxenas da Cámara de Deputados mexicana aprobou unha resolución para introducir o ensino das linguas indíxenas na educación básica.

Fonte: Starmedia

No marco da aplicación da lei peruana que regula o uso, preservación e difusión das linguas orixinarias do Perú, funcionarios do Ministerio de Cultura e do Goberno Rexional de Puno reuníronse para promover nas institucións públicas o uso do quechua e o aimará.

Fonte: Los Andes

As últimas cifras do censo de 2011 mostran que, en Escocia, continúa diminuíndo o uso do gaélico nas zonas onde tradicionalmente había máis falantes nativos. Entre as razóns inclúese o éxodo dos falantes nativos a outras zonas ou a chegada de persoas doutros lugares que non falan a lingua.

Fonte: BBC

O Ministerio de Educación dos Emiratos Árabes Unidos e o grupo editorial Kalimat asinaron un acordo para desenvolver novos recursos pedagóxicos en lingua árabe.

Fonte: Gulfnews