O Goberno de Sri Lanka prevé a introdución obrigatoria das linguas locais, a relixión e a historia nacional nas escolas privadas do país, incluídos os centros internacionais de ensino.

Fonte: Colombo Page

Un organismo de control educativo de Gales desvela que máis do 80 % do alumnado de idades comprendidas entre os tres e os sete anos está progresando na aprendizaxe do galés nas escolas onde o ensino se desenvolve só por medio desta lingua.

Fonte: Wales Online

O Ministerio de Cultura do Perú anunciou que adoptará medidas para preservar o quechua e incrementar o número de peruanos que actualmente falan e entenden o idioma dos incas en todo o país.

Fonte: Letralia

Os responsables da Secretaría de Política Lingüística do Tribunal Supremo de Xustiza de Paraguai presentaron o dicionario dixital guaraní para o seu uso no ámbito xurídico.

Fonte: Abc

A lingua portuguesa é a quinta máis falada na rede social Twitter, segundo un estudo divulgado por unha empresa especializada en medios dixitais. O inglés segue liderando a lista, seguido do xaponés, o español e o malaio.

Fonte: Techtudo

O Tribunal Constitucional de Moldavia deliberou que a lingua oficial do país non é o moldavo senón o romanés.

Fonte: Voz da Rússia

Os brasileiros mostran preferencia pola aprendizaxe de linguas estranxeiras en internet. Un exemplo é a plataforma Busuu, unha rede social que empregan 3,5 millóns de brasileiros para aprender linguas.

Fonte: Bonde

En breve nacerá ÒcTele, unha televisión en liña que será a primeira en emitir a totalidade dos seus contidos en lingua occitana. A súa programación incluirá telexornais, debuxos animados e programas de entretemento durante catro horas diarias.

Fonte: Nationalia

O deputado Martin Candinas acaba de crear por primeira vez un grupo parlamentario romanche na Asemblea Federal de Suíza. Segundo explica a Radiotelevisión Suíza Romanche, Candinas quere que o grupo sirva para reforzar a presenza da lingua en Suíza, que aínda que é oficial nas institucións federais desde 1996, habitualmente ten menos peso que os outros tres idiomas oficiais (alemán, francés e italiano).

Fonte: Nationalia

Ducias de indíxenas, agrupados na Confederación de Nacionalidades Indíxenas de Ecuador, maniféstanse en Quito polo dereito universal de acceso á educación na lingua propia.

Fonte: El Universal