Aínda que no ano 2010 vivían en México pouco máis de 6 millóns de falantes dunha lingua indíxena, esta cantidade foi diminuíndo, revelou a directora da Facultade de Filosofía e Letras, María de los Ángeles Corona Castellanos, polo que considerou necesario desenvolver accións que permitan o seu rescate e ensino co fin de preservar a identidade ancestral.

Fonte: La Jornada de Oriente

O partido galés Plaid Cymru defende que o alumnado de primaria debería recibir ensino en tres linguas e presentou un informe que analiza modelos europeos de ensino onde está normalizada a aprendizaxe de varias linguas en idades temperás. Os membros deste partido apostan tamén por mellorar o ensino da lingua galesa nas escolas.

Fonte: BBC

O Parlamento de Crimea aprobará en breve a súa nova constitución, adaptada ao marco legal da Federación Rusa e, aínda que non prevé ningunha autonomía territorial para os seus pobos, manterá a tripla oficialidade do ruso, ucraíno e tártaro.

Fonte: Nationalia

Despois de dúas décadas de investigación, en breve publicarase un dicionario da lingua badimaia, falada pola comunidade do mesmo nome no oeste de Australia. O traballo no dicionario comezou en 1990 e está baseado na información recollida aos últimos falantes nativos desta lingua.

Fonte: ABC

Un informe mostra que o número de alumnos que están a cursar unha carreira universitaria do ámbito lingüístico no Reino Unido é o máis baixo nunha década. Só entre os anos 2010 e 2013, o número de admisións en licenciaturas de linguas caeu un 22 %.

Fonte: The Guardian

Segundo o diario People's Daily, o Ministerio de Educación de China e o Comité Nacional de Linguas están traballando nunha regulación para estandarizar o uso de palabras de orixe estranxeira na sociedade.

Fonte: ECNS

Un xuíz declarou que as empresas do Quebec que empreguen sinais cos seus nomes comerciais escritos nunha lingua diferente ao francés non están incumprindo a Carta da Lingua Francesa. Esta resolución produciuse despois de que algunhas multinacionais levaran aos tribunais a Oficina Quebequesa da Lingua Francesa por obrigalas a mudar os seus nomes ante o risco de perderen o dereito a operar na provincia.

Fonte: Montreal Gazette

O Ministerio de Educación do Brasil creou a Comisión Nacional do Instituto Internacional da Lingua Portuguesa da Comunidade de Países de Lingua Portuguesa (CPLP) que se ocupará de definir políticas multilaterais para atender a crecente demanda de ensino de portugués no mundo.

Fonte: Portal Brasil

O Parlamento de Escocia decidiu apostar pola promoción da lingua escocesa ou Scots, idioma que, segundo o censo de 2010, ten polo menos un millón e medio de falantes. Entre as iniciativas destácase a creación dunha rede de coordinadores en lingua escocesa que ofrecerá apoio ao profesorado para poder introducilo no ensino.

Fonte: The Economist

O Parlamento Nacional de Timor Leste utilizou de novo a lingua portuguesa no debate semanal que ten lugar todos os martes. A decisión de desenvolver este debate en lingua portuguesa foi tomada co fin de conferir respecto á lingua oficial do país e mellorar a produción oral neste idioma por parte dos parlamentarios.

Fonte: Jornal Digital