O próximo día 5 de maio celébrase o Día da Lingua Portuguesa e da Cultura na Comunidade de Países de Lingua Portuguesa (CPLP). A Porto Editora publicará con motivo desta data unha edición actualizada do Dicionario Editora da Lingua Portuguesa.

Fonte: Diário Digital

Entre 10 000 e 20 000 accidentes laborais teñen a súa orixe en problemas de tipo lingüístico nos Países Baixos, declarou a fundación do ámbito do traballo Stitching van de Arbeid. Ademais, declara que entre un 5 % e un 10 % deses accidentes están causados pola falta de coñecementos suficientes de neerlandés.

Fonte: Dutch News

O candidado ao Parlamento Europea do partido irlandés Fianna Fáil, Thomas Byrne, declarou que a Unión Europea debe rematar a discriminación que a lingua irlandesa está a sufrir en Europa. Segundo as súas palabras, as sucesivas derogacións que a Unión Europea fixo do recoñecemento do irlandés como idioma oficial non obrigan a traducir a esta lingua todas as leis e documentos oficiais.

Fonte: The Irish Times

Un estudo realizado pola empresa Deloitte revela que se reduciu o número de estudantes de inglés en Malta respecto ao ano anterior. O informe tamén mostra que a estadía dos estudantes foi polo xeral máis longa.

Fonte: Times of Malta

Un estudo realizado no centro médico Cohen Children de Nova York revelou que os nenos entre os 0 e os 3 anos que utilizaron aparellos electrónicos de pantalla táctil para xogar a xogos de contido non educativo mostraron un desenvolvemento lingüístico tardío.

Fonte: Daily Mail

Con motivo do Día da Lingua Portuguesa e da Cultura, o Instituto Portugués do Oriente (IPOR), situado en Macau (China), presenta un novo espazo en liña, a Árbore de Recursos da Lingua Portuguesa, que axudará ao ensino e aprendizaxe do portugués como lingua estranxeira.

Fonte: Público

O exame de selección de docentes de ensino primario do estado indio de Karnataka incluirá por primeira vez outras linguas como medio de instrución e non só o canarés e o inglés. Estas novas linguas son o urdú, o támil, o telugú, o hindi e o maratí.

Fonte: Deccan Herald

O Instituto Francés de Alxeria lanza un novo portal totalmente gratuíto dedicado á aprendizaxe da lingua francesa. O país africano, que ten o francés como primeira lingua estranxeira por diante do inglés, é o terceiro país francófono máis importante do mundo, despois de Francia e o Congo, segundo un estudo realizado en 2010 polo Observatorio da Lingua Francesa.

Fonte: Le Nouvel Observateur

O feito de que os estados lusófonos non ratificaran o Acordo Ortográfico non reduce o poder do portugués como lingua internacional, mesmo se é desexable que haxa un entendemento entre todos os países en relación con este tema, declarou un investigador do instituto portugués de investigación ISCTE.

Fonte: Público

A oficina postal de Cabo Verde uniuse ás conmemoracións dos 800 anos da lingua portuguesa coa emisión dun selo conmemorativo da efeméride con motivo do Día da Lingua Portuguesa e da Cultura na Comunidade de Países de Lingua Portuguesa (CPLP). As actividades conmemorativas do oitavo centenario da lingua común nos oito países da CPLP (Angola, Brasil, Cabo Verde, Guinea-Bisau, Mozambique, Portugal, San Tomé e Príncipe e Timor Leste) terán lugar ata xuño de 2015, co obxectivo principal de reafirmar a importancia da lingua portuguesa no mundo.

Fonte: Portugal Digital