O comité permanente de xustiza da Asemblea Nacional de Paquistán rexeitou por maioría unha lei que buscaba garantir o status de lingua nacional para os idiomas rexionais.

Fonte: Dawn

O máis alto representante do Concello de Cardiff, Phil Bale, anunciou que a capital galesa contará cun novo centro para a aprendizaxe do galés. A decisión foi revelada con motivo da celebración do festival anual da lingua galesa Tafwyl.

Fonte: BBC

A Academia Latina das Artes e Ciencias da Gravación dos Estados Unidos outorgaralles o premio Grammy de carreira a dous artistas lusófonos, o fadista portugués Carlos do Carmo, de 74 anos, e o cantante brasileiro Ney Matogrosso, de 72.

Fonte: Euronews

O sitio web da televisión pública en lingua galesa S4C será un dos primeiros en utilizar os novos dominios .cymru e .wales en internet. O director de contidos da canle, Garffild Lloyd Lewis, declarou que "Mudarse aos dominios .cymru e .wales fortalecerá o status da única canle de televisión en lingua galesa do mundo".

Fonte: South Wales Evening Post

As metodoloxías de ensino da lingua portuguesa e a importancia do ensino das linguas nacionais serán algúns dos temas tratados nas II Xornadas Científico-pedagóxicas da Escola de Formación de Profesores (EFP) de Angola.

Fonte: ANGOP

A empresa de telecomunicacións Swisscom ofrecerá 16 novas canles de televisión para os clientes de lingua italiana do cantón suízo de Tesino.

Fonte: Tio

O presidente da República de Portugal, Cavaco Silva, defendeu en Dili (Timor Leste) que a lingua portuguesa e a defensa da paz, a democracia e os dereitos humanos son valores identitarios da Comunidade de Países de Lingua Portuguesa (CPLP) e deben continuar a determinar as súas decisións.

Fonte: Notícias ao Minuto

O Goberno de Guinea Ecuatorial anunciou a súa adhesión á Comunidade de Países de Lingua Portuguesa (CPLP) no seu sitio oficial en internet en español, inglés e francés mais non en portugués.

Fonte: Económico

A designación de Joe McHugh como novo ministro das zonas de fala irlandesa ("Gaeltacht") levantou fortes críticas nalgúns sectores da sociedade irlandesa xa que non fala a lingua con fluidez. A primeira acción do ministro foi inscribirse nun curso de irlandés na localidade de Glencolmcoille.

Fonte: RTE

Un equipo de investigadores do Instituto Superior de Enxeñería do Porto (ISEP) está a desenvolver unha ferramenta de tradución bilateral da lingua de signos portuguesa que permitirá identificar xestos, movementos corporais e faciais e traducilos a texto.

Fonte: Público