O Centro de Linguas do Instituto de Letras e Ciencias Humanas da Universidade do Miño ofrecerá durante os meses de xuño e xullo cursos de alemán, inglés, español, francés, italiano, xaponés, ruso e portugués como lingua estranxeira.

Fonte: Gazeta do Rossio

O Uruguai manifesta o seu interese por integrar, en calidade de observador, a Comunidade de Países de Lingua Portuguesa.

Fonte: Vermelho

O consello municipal de Quimper (Francia) aproba unha declaración para adoptar unha política cultural e lingüística a favor do bretón.

Fonte: Ouest France

O ministro principal de Gales anunciou que se crearán seis novos centros para fomentar o uso e a aprendizaxe do galés. Ademais de en Cardiff, os novos centros estarán en Anglesey, Bangor, Cardigan, Pontardawe e Tregaron.

Fonte: BBC

Un lingüista mozambicano da Universidade Eduardo Mondlane defende a importancia de Mozambique na expansión da lingua portuguesa. Actualmente, o 50 % da poboación do país africano fala portugués.

Fonte: Sapo

Os gobernos da rexión francesa de Ródano-Alpes e da italiana Val de Aosta asinaron un documento que garante políticas transfronteirizas a prol do fomento e desenvolvemento da lingua francoprovenzal, unha das máis ameazadas de Europa.

Fonte: Nationalia

A maior escola chinesa de linguas estranxeiras, a Universidade de Estudos Estranxeiros de Beijing, aspira a ofrecer ata 2020 cursos en 95 linguas diferentes.

Fonte: Diário Digital

O ministro de Exteriores de Timor Leste, Hernâni Coelho, defendeu, con motivo do día de Portugal, a importancia económica da lingua portuguesa.

Fonte: Notícias ao Minuto

No marco da súa reunión anual, a Rede Europea para a Diversidade Lingüística (NLPD, nas súas siglas en inglés) organizou un seminario co obxectivo de intercambiar as mellores prácticas en materia de política e planificación lingüística en toda Europa.

Fonte: NPLD

O servizo de megafonía da estación de Shin Ōkubo do metro de Toquio (Xapón) ofrece mensaxes en catalán e vasco.

Fonte: Jornalet