O dicionario Oxford da lingua inglesa incorporou dez entradas en galés pola influencia que esta lingua ten no inglés falado no País de Gales.

Fonte: BBC

A comisaria da Lingua Galesa, Efa Gruffudd Jones, reclamou un maior compromiso das institucións para garantir que as persoas falantes de galés que padezan demencia dispoñan de servizos adaptados na súa lingua.

Fonte: The Pembrokeshire Herald

O 26 de setembro, Europa celebra o Día Europeo das Linguas, unha iniciativa promovida polo Consello de Europa, cuxo obxectivo é sensibilizar a cidadanía sobre a relevancia da aprendizaxe de linguas e a urxencia de preservar o valioso patrimonio lingüístico de Europa. Este ano, o lema é "Linguas para a paz", xa que a diversidade lingüística desempeña un papel esencial na construción dunha sociedade de paz, convivencia e democracia.

Fonte: Council of Europe

O Ministerio de Gobernación de Guatemala traducirá ao idioma quiché as noticias máis relevantes do seu portal. Con esta iniciativa, Guatemala quere promover a diversidade cultural e lingüística e dar un primeiro paso para preservar as linguas maias nativas.

Fonte: Agencia Guatemalteca de Noticias

O Goberno de Suráfrica aprobou unha polémica lei educativa que segundo os partidos da oposición podería ameazar o ensino da lingua afrikaans.

Fonte: The Guardian

Nun proceso de rusificación sen precedentes, as escolas de Belarús abandonan paulatinamente a lingua bielorrusa en favor do ruso, que se está convertendo tamén no idioma predominante nas institucións públicas e nos medios de comunicación.

Fonte:  Euronews

Francia e Armenia asinan un acordo para promover o ensino da lingua francesa nas escolas públicas. O país galo vai investir 600 mil euros neste proxecto.

Fonte: OC Media

O secretario de Estado do Ensino para as Minorías de Romanía, Zoltán Kallós, anunciou o reforzo do ensino do húngaro entre a minoría étnica que reside na rexión romanesa de Transilvania.

Fonte: Hungary Today

Hai 26 anos, o Goberno de Portugal oficializou o mirandés como segunda lingua oficial. Con motivo desta celebración, o Instituto Politécnico de Bragança manifestou o seu interese por estudar esta lingua e promover o seu ensino e asinará un protocolo coa Associação de Cultura e Língua Mirandesa.

Fonte: Rádio Bragança

O Parlamento de Lituania aprobou unha lei que esixirá o coñecemento de lituano nos postos do sector servizos en todo o país. As persoas traballadoras que non cumpran este requisito poderían ser multadas.

Fonte: Schengen News