O Instituto Brasileiro de Xeografía e Estatística publicou un estudo que revela que a porcentaxe de indíxenas que falan unha lingua nativa é seis veces maior entre os que viven en terras indíxenas que entre aqueles que se trasladan ás cidades.

Fonte: Vestibular

A asociación Frauga e o Agrupamento de Escolas de Miranda do Douro (AEMD, polas súas siglas en portugués) participaron na publicación de material didáctico en lingua mirandesa que se poderá empregar nos centros de ensino do concello transmontano.

Fonte: Notícias ao Minuto

A Academia Francesa outorgou ao filósofo portugués Eduardo Lourenço o Premio de Divulgación da Lingua e Literatura Francesas por escribir boa parte da súa obra neste idioma.

Fonte: Correio da Manhã

O ministro do Interior de Suíza, Alain Berset, mostrouse disposto a elaborar unha política común que harmonice o ensino das linguas tanto nacionais como estranxeiras nas escolas de todo o país.

Fonte: Swissinfo

A Academia das Ciencias de Lisboa nomeará os galegos José-Martinho Montero Santalha, José Ângelo Cristóvão Angueira e Isaac Alonso Estraviz como académicos desta institución que asesora o Goberno portugués en materia de lingua.

Fonte: Sermos Galiza

O club de fútbol do Manchester City presentou unha conta oficial en lingua catalá que conta xa con máis de 10 000 seguidores.

Fonte: Jornalet

O val de Swansea conta xa cun novo centro da lingua galesa que se dedicará a actividades educativas e de ensino do galés, así como á dinamización cultural. O centro recibiu financiamento da Universidade de Swansea e do Goberno do País de Gales.

Fonte: South Wales Evening Post

Emisoras públicas de televisión dos estados que integran a Comunidade de Países de Lingua Portuguesa estrean Programa Nossa Língua, un espazo televisivo que retransmitirá documentais de todos os países lusófonos. O obxectivo non é outro que o intercambio cultural en lingua portuguesa.

Fonte: Mundo Lusíada

O Goberno alemán acaba de aprobar novas leis que obrigan os demandantes de asilo a facer cursos de lingua e integración para poder traballar e ficar no país.

Fonte: The Telegraph

O ministro de Educación do cantón de fala italiana de Ticino sente que, na problemática sobre que lingua ou linguas se deben ensinar nas escolas, Suíza esquece con frecuencia que o italiano é a terceira lingua nacional e que, por tanto, debe estar ao mesmo nivel que o alemán e o francés.

Fonte: The Local