O nluu é unha lingua nativa da República de Suráfrica mais as novas xeracións xa non a falan pola presión doutros idiomas oficiais. Katarina Esau, unha das súas últimas falantes, decidiu embarcarse nun proxecto de aprendizaxe a nenos e nenas para salvala da extinción.

Fonte: BBC

Ante as críticas que defenden a súa dificultade, o Goberno de Australia vai simplificar a proba que se realiza para que persoas doutros países poidan obter a nacionalidade australiana.

Fonte: Daily Mail

A University College de Londres recoñecerá a lingua de signos británica como idioma estranxeiro para o acceso á institución de ensino superior.

Fonte: The Irish News

A vila alentexana de Almódovar acolle a segunda edición do festival "Escritas do Sul" que celebrará as diferentes expresións da lingua portuguesa como a música e a literatura.

Fonte: Sapo 24

Un centro cultural dunha localidade do norte de Australia acaba de publicar un dicionario de miriwoong que podería axudar a salvar esta lingua aborixe australiana da desaparición. Actualmente, menos de 10 persoas conseguen falala con fluidez.

Fonte: ABC News

A última análise estatística realizada polo Goberno do Canadá revelou que entre 2011 e 2016 se produciu un acusado descenso do número de cidadáns canadenses que teñen o húngaro como primeira lingua.

Fonte: Hungarian Free Press

Cun total de 220 linguas maternas, California é o estado máis diverso lingüisticamente dos EUA e seis millóns de persoas declaran que non poden falar inglés con fluidez. Ante esta situación, os tribunais do estado non conseguen ofrecer suficientes servizos de interpretación para satisfacer todas as necesidades lingüísticas.

Fonte: Los Angeles Times

A canle pública de televisión en galés S4C estreará unha serie gravada en galés e inglés que espera atraer telespectadores que falen as dúas linguas. O programa tamén recibiu críticas daqueles que pensan que a canle debería ofrecer sempre contidos exclusivamente en galés.

Fonte: The Guardian

Ante a forte demanda mostrada nos últimos meses e a crecente influencia de China como potencia mundial, unha institución educativa británica decidiu estender os seus servizos e abrir en Londres a súa segunda escola infantil bilingüe inglés-chinés.

Fonte: Day Nurseries

Un falante de 22 anos documentou por vez primeira a lingua falada nunha zona do centro de Escocia: o focurc. Trátase dunha variedade lingüística semellante á lingua escocesa ou scots.

Fonte: iNews