O uso do chinés mandarín duplicouse na cidade de Hong Kong desde 1997, ano en que a rexión deixou de pertencer ao Reino Unido. Porén, sobre todo entre a xente nova, as persoas están optando actualmente por empregar só a lingua local, o cantonés, porque ven o chinés mandarín como un símbolo da influencia cultural de China. Moitas persoas temen mesmo que esta situación poida pór en risco a supervivencia do cantonés.

Fonte: BBC

A entidade que xestiona a rede de ferrocarrís da India deu o visto e prace para que os billetes poidan emitirse na lingua local dos diferentes estados, ademais de hindi e inglés.

Fonte: News 18

O concerto solidario polas vítimas do incendio forestal de Pedrógão Grande no distrito portugués de Leiría foi interpretado integramente á lingua de signos portuguesa.

Fonte: Sol

As xornadas Mergullo na Lingua Portuguesa de Hamburgo, a Semana da Lingua Portuguesa de Colonia e as Lusitaníadas de Osnabrück son algunhas das iniciativas que se desenvolven en Alemaña para promover e dinamizar o ensino da lingua de Camões.

Fonte: Mundo Português

As cidades máis importantes de Australia comezaron as celebracións para conmemorar a cultura dos aborixes australianos e dos pobos orixinarios do estreito de Torres.

Fonte: Xinhua

Unha organización australiana sen ánimo de lucro creou un programa que permite dixitalizar contidos de texto, vídeo e audio sobre linguas indíxenas para permitir a súa preservación.

Fonte: ABC

O servizo de correos de Italia, Poste Italiane, abriu o primeiro posto de atención en lingua de signos nunha oficina da cidade véneta de Vicenza. O obxectivo é estender esta iniciativa a outros lugares do país.

Fonte: Il Mattino di Padova

Un total de 64 estudantes de 18 nacionalidades participará en Braga nos cursos de lingua portuguesa para estranxeiros da Universidade do Miño. A crecente participación demostra a importancia que está a adquirir o portugués a nivel internacional.

Fonte: Diário do Minho

A comunidade de falantes de español dos EUA criticou a administración de Donal Trump por descoidar e abandonar o uso da lingua española nas comunicacións oficiais e en redes sociais como Twitter.

Fonte: The Guardian

Unha enquisa realizada polo British Council revelou que existe unha forte preocupación entre o profesorado do País de Gales polo futuro do ensino das linguas modernas no sistema educativo. O estudo mostrou, por exemplo, que o 61 % das escolas teñen menos de cinco alumnos estudando unha lingua estranxeira no último ano do bacharelato.

Fonte: BBC