A Xunta de Galicia, por medio da Consellería de Cultura, Educación e Ordenación Universitaria, e mais o Consello da Cultura Galega (CCG) organizarán este ano o foro Galician Language, que congregará en Santiago de Compostela expertos galegos e internacionais nun encontro centrado na lingua galega.

Fonte: Xunta de Galicia

O Grupo Barrán, empresa de Santiago especializada en formación e desenvolvemento arredor do software libre, infórmanos dunha importante novidade no seu catálogo de recursos informáticos: un servizo electrónico en galego baixo o dominio .gal, de balde, e que sería quen de achegar as máximas condicións de seguridade e privacidade para o usuario.

Fonte: Código Cero

Os Premios á Calidade Lingüística destacarán os mellores traballos académicos, proxectos de fin de carreira (PFC) ou traballos de fin de grao (TFG) e os mellores traballos de fin de mestrado (TFM) redactados en galego neste curso académico 2013-2014.

Fonte: Universidade de Santiago de Compostela

A Xunta de Galicia vén de celebrar a entrega de premios do certame de declaracións de amor na rede Lingua de namorar, convocado polas consellerías de Cultura, Educación e Ordenación Universitaria (a través da Secretaría Xeral de Política Lingüística) e de Traballo e Benestar (a través da Dirección Xeral de Xuventude e Voluntariado) con motivo da conmemoración do Día da Candeloria o pasado 2 de febreiro.

Fonte: Xunta de Galicia

Da man da Compañía de Radio Televisión de Galicia, da Asociación de Escritores en Lingua Galega e da Asociación do Libro Infantil e Xuvenil Galix presentábase a campaña #engalegoleo. Esta iniciativa pretende promover a literatura na nosa lingua animando os lectores a compartir as súas preferencias mediante as redes sociais, nomeadamente Twitter.

Fonte: Culturagalega.org

As Google Glass, as lentes intelixentes de Google, aterraron en Galicia para a súa presentación oficial a cargo do desenvolvedor tecnolóxico Andreu Ibáñez. En xuño coñeceranse as datas de lanzamento nos distintos países desta tecnoloxía que, cando saia en España, estará "cen por cento" preparada para a súa configuración en galego.

Fonte: Galicia Hoxe

No ano en que se cumpren dúas décadas da aparición dos primeiros videoclips en galego da man do mítico programa da TVG Xabarín Club, o Festival de Cans prepárese para celebralo, coa proxección de documentais e videoclips, e o concerto dun dos principais expoñentes desta corrente musical: Heredeiros da Crus.

Fonte: Faro de Vigo

A Comisión Interuniversitaria de Política Lingüística porá en marcha o proxecto Funil.gal, unha iniciativa que procurará dotar a lingua galega de novas ferramentas multimedia para o ámbito científico, inicialmente no ámbito da química e, en concreto, no terreo das prácticas de laboratorio nas tres universidades galegas.

Fonte: Universidade de Santiago de Compostela

Tras a activación técnica do .gal o pasado 11 de abril, aproveitouse a data do Día das Letras Galegas e do Día Internacional das Telecomunicacións e a Sociedade da Información para presentar a primeira páxina web creada baixo este dominio, na que se dá conta dos prazos de lanzamento e as condicións para poder acceder aos novos dominios.

Fonte: Código Cero

A Consellería de Cultura, Educación e Ordenación Universitaria, por medio da Secretaría Xeral de Política Lingüística, convocou dez prazas en lectorados de lingua, literatura e cultura galegas en España, Portugal, Irlanda e Italia.

Fonte: Xunta de Galicia