O Goberno de Eslovenia incrementará os requisitos lingüísticos en lingua eslovena para os cónxuxes estranxeiros que queiran solicitar reunificación familiar.

Fonte: Schengen Visa

O municipio portugués de Matosinhos, na área metropolitana do Porto, ofrece un servizo gratuíto de interpretación en lingua de signos co obxectivo de garantir a integración social de todas as persoas xordas.

Fonte: CM Matosinhos

Estímase que a medida aprobada no Goberno de Estonia, que obriga as escolas a ofreceren dúas ou máis linguas estranxeiras nos seus plans educativos, acabará por provocar unha redución na demanda de profesorado de ruso. O estudo desta lingua eslava xa se reduciu nalgúns centros de ensino estonianos este curso académico.

Fonte: ERR 

A artista baiana Xenia França gañou o Grammy Latino 2023 polo seu mellor álbum pop en lingua portuguesa. A gala de entrega de premios aconteceu na cidade española de Sevilla.

Fonte: G1 Globo

Unha lingüista da Facultade de Letras da Universidade de Lisboa declarou que o ensino do portugués como lingua estranxeira no sistema educativo de Guinea-Bissau, e non como lingua de instrución, contribuiría a incentivar o desenvolvemento do país africano.

Fonte: Notícias ao Minuto

Desde 2009, o número de estudantes que cursa linguas estranxeiras nas universidades estadounidenses caeu drasticamente e isto podería pór en risco a seguranza nacional dos EUA. 

Fonte: Ohio Capital Journal

Un estudo elaborado pola Universidade de Finlandia Oriental revela que o uso xeneralizado do inglés en Finlandia non ameaza a posición do finés. Restrinxir o uso desta lingua podería danar a cooperación internacional e a integración de persoas estranxeiras no país nórdico.

Fonte: YLE

O Goberno do País de Gales informou de que o primeiro ano do programa de aulas gratuítas de galés para adolescentes e persoal de centros educativos tivo moi boa acollida e evidenciou que nunca antes fora tan fácil aprender a lingua vernácula.

Fonte: Welsh Government/Llywodraeth Cymru

Co obxectivo de promover o respecto dos dereitos das persoas xordas, Portugal celebra o seu Día Nacional da Lingua de Signos Portuguesa.

Fonte: Antena 1

O deputado do Plaid Cymru, Llyr Gruffydd, denunciou na Asemblea de Gales que o banco británico HSBC cancelou a liña de atención telefónica en galés deixando sen este servizo á comunidade de lingua galesa do País de Gales.

Fonte: Nation Cymru