Un estudo elaborado na Universidade de Helsinqui revelou que un quinto dos nenos e nenas de familias estranxeiras que estudan finés como segunda lingua deberían estudala como lingua nativa xa que o seu nivel é equiparable a aquelas que o falan como lingua materna.

Fonte: Helsinki Times

Diversos grupos empresariais do Reino Unido pediron ao Goberno británico que dea prioridade ás habilidades lingüísticas á hora de deseñar os currículos dos cursos de formación profesional. Un estudo revelou que as materias de linguas estranxeiras case non se ofertan neste nivel educativo no Reino Unido.

Fonte: The Guardian

O próximo ano lectivo 2023-2024, Guinea-Bissau contará co primeiro mestrado de Lingua Portuguesa na historia do país e será ofertado pola Escola Superior Tchico Té.

Fonte: RFI

Unha investigación da Universidade de Leiden (Países Baixos) lembra que o ser humano debe garantir a protección da selva amazónica para poder preservar a súa diversidade lingüística e cultural.

Fonte: MiPutumayo

O Instituto Camões e o Banco Santander renovaron un protocolo de colaboración para apoiar a lingua portuguesa. En concreto, o compromiso estará dirixido ao pagamento de bolsas para a realización de cursos en Portugal e en portugués.

Fonte: VISÃO  

As reunións públicas que se celebren na Cámara Municipal da cidade portuguesa de Évora terán agora dispoñible a interpretación en lingua de signos portuguesa.

Fonte: O Digital

A Administración Nacional de Aeronáutica e Espazo (NASA, polas súas siglas en inglés) publicou páxinas web sobre aeronáutica en español coa intención de facer máis accesible este campo a toda a comunidade que fala este idioma.

Fonte: NASA

Un grupo de xornalistas presentou Diligente, o primeiro órgano de comunicación social en portugués de Timor Leste. Trátase dun proxecto exclusivamente en lingua portuguesa que pretende reforzar os medios de comunicación timorenses.

Fonte: Observatório da Língua Portuguesa

O Goberno de Irlanda elaborou un informe onde fixo balance da aplicación da Lei de linguas oficiais durante todo o ano pasado. Entre os logros saliéntase, entre outros, o incremento da publicidade en gaélico nos medios de comunicación.

Fonte: Gov.ie

A cidadanía neerlandesa comprou 43,2 millóns de libros o ano pasado, o que supón un incremento do 0,4 %. Os exemplares en lingua inglesa lideraron as vendas mentres que as obras en neerlandés caeron un 3 %.

Fonte: NL Times